Read Banggai SADEONG 132 Bible Online

SADEONG 132 - Banggai bible

SADEONG 132

¹Nyanyian ziaraan. Oh TEMENENO, neneekekai doi Daud, tukon sasaibino kona sakisaawan.

²Inai motoliminggene naikon kona sombaan doi-Koo TEMENENO, tukon niat doi-Koo TEMENENO Mo Bukuan Tuuno, Yakub na Mian Bisa.

³Kona bantilano, “Akikai kutade doi kubonua kai moolo doi kutampat mooloan,

⁵kalu akiyoon kumasadiakene bonua motuuk doi Yakub na Mian Bisa, tampat nadungolan ko TEMENENO Mo Babasal Konakuasa.”

⁶ Doi Betlehem kita lengele tentang ko Peti Perjanjian, tukon pinososuunggono doi Yaar padango.

⁷Maikai nda taus doi TEMENENO nadungolan, tukon nda sosubaiyo Yana doi kulusii batomundoan salaano.

⁸Lubatokai tukon dungolokai doi Mu Bonua, oh TEMENENO, podungoli komu Peti Perjanjian, tanda Mukakuasaan.

⁹Boliisi Komu umat nawookon labalaba, tukon sasaibino Komu imam nasidutu tubo loingiyo Komu mongiasan.

¹⁰Tongo Daud, Mupeleleani, inaikai motolake Komu tomundo pinili.

¹¹ Ko TEMENENO batotopimo doi Daud; Yana aki naikon naakiyenggene Kona perjanjian. Kona bantilano, “Komeeng komu pau naikon Yaku tealikene tomundo sulano namaparenta tukon soboliyo ikoo.

¹²Kalu komu pau-pau taat doi Kuperjanjian, tukon taatiyo Daku parenta-parenta, maka konapo katurunan sidutu-posidutukon soboliyo ikoo salaku tomundo.”

¹³Sabab ko TEMENENO lilikemo ko Sion; tukon Yana yase sulano Nadungol idoo.

¹⁴Kona bantilano, “Naimbaamokai Daku dungolan tuuk sidutu-posidutukon, sabab Yaku yase bapamarenta nai lipu nia.

¹⁵Sasaibino kona kapalaluuwan Yaku daanekene tukon lobi-lobian, komian mo talalais Yaku beena kaan tukon bobosul.

¹⁶Kona imam-imam okitakene kokasalamatan moluwedoi Yaku; tukon kona umat wookon laba tukon manyanyi.

¹⁷ Naimbaa daano komeeng komian Daud katulunan Yaku tealikene tomundo; tukon kona bapamarentaan Yaku naikon ekeenggele,

¹⁸Kona batomundoan naikon sidutu aman, bai kona musuh-musuh naikon ianakamaa.”