Read Banggai SADEONG 135 Bible Online

SADEONG 135 - Banggai bible

SADEONG 135

¹Nggaalano ko TEMENENO! Ponggaalekai ko TEMENENO sambuno, eh komuyu Kona pele-peleleani

²mo kaleda doi TEMENENO Na Bonua doi nda Mian Bisa nadungolan.

³Ponggaalekai ko TEMENENO, sabab Yana monondok, ponggaalekai kosambuno, sabab Yana monondok konoano.

⁴Yana piliyo Yakub tuuk doi butongo, ko Israel miano Yana tealikene naumat.

⁵Sabab yaku toiyo tutuu ko TEMENENO babasal tuuno, Konakuasa nababasalan liisiyo sasaibino kodewa.

⁶Moola nalakukanggene oilamo Kona iniyas, doi timbu tukon doi buta, doi tobun tukon doi dapang motatandak.

⁷Yana olubatene kobunom luwedoi dunia bunduno, tukon tealikene kodidip moolubatene koudan. Maka naparentayo kombombuul sulano natobuat luwedoi natangabosan.

⁸Doi Mesir Yana akateyo sasaibino kopau langgongo moluwedoi manusia pauno maukai doi iyayon pauno.

⁹Indaa badaang kolangge minasaindinggon tukon paloosan Yana mokubaiyo tuuk naukumano kotomundo tukon sasaibino konapagauwe.

¹⁰Badaang kobangsa Kona inakate kabus, tukon akateyo kotomundo-tomundo motambongan tukon barani:

¹¹Doiyamo Sihon tomundo Amori tukon Og tomundo Basyan, tukon sasaibino kotomundo doi Kanaan.

¹²Maka konapo lipu Yana beekenemo teali Naumat, Israel miano nalipu.

¹³Oh TEMENENO, Ikoo naikon tataap mobinabotilanggon, tukon sasaibino kokatulunan tataap neneeke kosambumu,

¹⁴sabab Ikoo beena kaadilan doi Muumat, tukon Ikoo seseange Komu pele-peleani.

¹⁵ Konapo uuno luwedoi mosoni tukon suasa, banggapi limano komo kubaiyo.

¹⁶Kobabanoila daano, bai aki namoola basilingan, daano komatano, bai aki namoola mokita oioila.

¹⁷Daano kotolingainoila, bai aki namoola molongol oioila, konapo ansaang aki natobuat doi babanoila.

¹⁸Boliisi nabuno doiya kona nasib komian mokubaiyo, tukon mo maangga doiyana.

¹⁹Eh komuyu ko Israel miano, ponggaalekai ko TEMENENO, eh komuyu ko Mian Bisa Naimam-imam, ponggaalekai Yana!

²⁰Eh komuyu ko Lewi miano, ponggaalekai ko TEMENENO, tukon komuyu sasaibino komian mo taat, ponggaalekai Yana.

²¹Ponggaalekai ko TEMENENO doi Sion, doiyamo doi Yerusalem Kona tampat dungolan. Ponggaalekai ko TEMENENO!