Read Banggai SADEONG 139 Bible Online

SADEONG 139 - Banggai bible

SADEONG 139

¹Tuuk mopimpine konyanyian. Daud na Sadeong. Oh TEMENENO, Ikoo toiyo konoanggu lalomo tukon Ikoo toiyaku.

²Sasaibino dakukokubai Ikoo toiyo; mau kudodoon bai Ikoo toiyo daku pikilan.

³Ikoo kitaaku, mau doi kubalimangan kai doi kutatadean, tukon Ikoo toiyo sasaibino daku kinubai.

⁴Tukon koidan akiyoon kubasilingan, Ikoo toiyomo oilamo daku binantil.

⁵Doi sasaibino kotampat kona lubatan daku musuh Ikoo tataap dagaiyaku; Ikoo dagaiyaku tukon Mukuasa.

⁶Todudul atean doiyaku Domu potoidoo, dakupikilan aki nalaate.

⁷Inaando daku moolaan taus sulano kuluput doi Mukuasadoo? Inaando daku moolaan bulen sulano kudodoon doi-Koo?

⁸Kalu yaku liba doitimbu, Ikoo daano indaa, Kalu moolo doi mian momate nalipu, idoo koidan daano Ikoo.

⁹Kalu yaku benga liisiyo kolembet uuno kai dungol doi talise bunduno mododoon tuuno,

¹⁰bai indaakai Ikoo tulungiyaku; tukon indaa koidan kolimamu taaniyaku momeenggon.

¹¹Kalu yaku kabiyo sulano kokalipookan nasinggoliyaku, maka komadialan doi kupotikunggonan teali popook,

¹²maka dokalipookanoo akimo nateali kalipookan doi-Koo; dopopookoo madialan pokakana kooloyo, tukon donakalipookananoo pokakana momadialan.

¹³Sasamba kobutonggu lolongguno Ikoomo komo pasitakayo, tukon komo kubaiyaku doi tinanggu natalikan lalomo.

¹⁴Yaku nggaale Ikoo sabab daku kinubaiyan bolikon langge! Sasaibino Komu kokubai minasaindinggon tukon inakabasal, tukon tutuu yaku sadariyomo.

¹⁵Doi natinealikonan kobuku-bukunggu, tukon monondok kona taaturan doi tinanggu natalikan lalomo, tukon koidan daku tuboan doi tinanggudoo natalikan lalomo doiya meeng korahasia, bai aki namoola kutosookon doi-Koo.

¹⁶Doi kudaanoan doi tinanggu nakandungan lalomo tataap Ikoo kitaaku; doi-Mu buku lalomo totulis sasaibino; mau naakiyoon komeengkai kolangge motinambuun bai koolo-oloyono lapamo tinantukanggon.

¹⁷Oh ko Mian Bisa, bulaando kona sulitan Komu pikilan doiyaku, tukon bulaando kona kadaang koaito!

¹⁸Kalu yaku aite, liisiyo kobone kona kadaang; kalu kubangun tataap yaku piki-pikikene Ikoo.

¹⁹Ikoo ko Mian Bisa, boliisi komian molokis muakateyo kabus, tukon dedeenggene komian momangakate doiyaku!

²⁰Yanila bantile Ikoo lokis, tukon yanila batotopi kala doi Mukota-kota.

²¹Oh TEMENENO, yaku mosikitene komian momosikitonggon Ikoo, mosikit konoanggu tuuk doi mian motumbokiikon Ikoo!

²²Yaku mosikitene tuuno doi yanila, tukon yaku anggene yanila musuh.

²³Ikoo ko Mian Bisa solidikiyakukai, kitayokai konoanggu lalomo, ujiyakukai sulano mutoiyo daku pikilan.

²⁴Kitayokai daano komo lokis doi butonggu lalomo, tukon andanaku doi loloon moakiyo kona pupusan.