Read Banggai SADEONG 22 Bible Online

SADEONG 22 - Banggai bible

SADEONG 22

¹Tuuk mopimpine konyanyian. Loingiyo kolagu: Donga doi tempo oloyo panano. Daud nanggaalano ko Temeneno.

² Daku Mian Bisa, oh daku Mian Bisa, bulaando Ikoo motinggalaku? Yaku uwang, bai Ikoo tataap dodoon tukon aki mutulungiyaku.

³Oh daku Mian Bisa, yaku uwang doi tempo oloyo, bai ikoo tataap batingaakon. Yaku sambeang doi tempo popook, konoanggu akimo koidan tanaang.

⁴Maukai Ikoo Tomundo Mo Moliyous, mo ngginaal-nggaal doi Israel.

⁵Komai mbumbu moini doi-Koo, yanila moini, tukon Ikoo salamatene yanila.

⁶Yanila uwang doikoo tukon inoluput; yanila moini tukon aki nateali manasal.

⁷Bai yaku nia ngganggale, bolikon bangkapi, kinokumbit tukon tinotulai mian badaang.

⁸ Sasaibino komo kitayo yaku sosiboliyaku, masambut tukon sualiling.

⁹ Konapo bantilan, “Batadikenemokai yana nabalanggene ko TEMENENO, sulano ko TEMENENO nasalamatene yana; kalu TEMENENO sanaang doi yana!”

¹⁰Ikoomokai komo tobuwatene yaku luwedoi natiniananggonan, tukon Ikoo kubaiyaku, aman doitinanggu nabangabian.

¹¹Salataa sosung, daku tuboan danoon doi limamu, salataa natiniananggonan Ikoomokai daku Mian Bisa.

¹²Inaikai moodoon, sabab kosilakaan lolanimo, tukon akiyo komo tulungiyo.

¹³Pokakana kobanteng tambuno badaang, musuh tikumakumo, pokakana kobanteng mbosolo luwedoi Basan yanila lobosiomo yaku.

¹⁴Yanila sasalaanaku tukon babanoila motobuka buka, bunokai singa mongangakon tukon mosoku.

¹⁵Kobukunggu kabus buno paisu mokinundang, saibino kobukunggu toliat luwedoi lolosuano, konoanggu seselet bunokai lilin.

¹⁶Kobulunggu lalomo motuul buno kokaca bisilo, koaleponggu lapot doi babanggu adeno. TEMENENO, Ikoo tinggaleme yaku doi ambatah bunggono bunokai mian momatemo.

¹⁷Yaku tinikumo gorombolan mian molokis; bunokai yanila naasu tambuno motikumemo yaku, motitiikiyo kolimanggu tukon ainggu.

¹⁸Sasaibino kobukunggu moola kuaite, komusuh na mbalengaku tongo buno permainan.

¹⁹ Yanila ebe-ebese dakupakean, tukon yanila mokubai undi luwedoi kujubah.

²⁰Bai ikoo, inaikai mododoon, oh TEMENENO, lubatokai soisobit tulungiaku, sabab Ikookai dakumalaatan bukuanan.

²¹Oluputekai daku nyawa luwedoi sabel, salamatanaku luwedoi asu nakakatan.

²²Akiyono kobukunggu sodiyomo yaku, luwedoi banteng tanduko tukon luwedoi singa suungo.

²³ Komu kokubai naikon kubasalitakene doi utus-utusonggu; doi Mumian naposungan lalomo yaku ngganggale Ikoo.

²⁴Ponggaalekai yana, eh mian-mian momaangga! Akabasalekai yana, sasaibino Yakub nakatulunan! Sombakai doi yana, sasaibino ko Israel nakatulunan!

²⁵Sabab yana aki nambalenge lokis komian mopinipiik, tukon aki nabatadikene kona kasusahan. Yana aki naabali luwedoi miannoo, bai lengele kalu yana makabai tulung doi yana.

²⁶Doi mumian napototongian yaku nggaale ikoo, sabab sasaibino komo lapamo ikoo lakukene. Doi Mumian momangangga salaano yaku sosubakene kososubakon molapamo yaku janjikene.

²⁷Komian motalalais naikon kaan polong bobosul, komian molubat doi TEMENENO naikon nggaale Yana. Boliisi posanaang sidutu posidutukon!

²⁸Sasaibino kobangsa naikon neneeke ko TEMENENO tukon abali doiyana, sasaibino kobangsa benseno naikon somba mososubaiyo yana.

²⁹Sabab tongo TEMENENOkai komo daano konakuasa, yana palentayo kobangsa-bangsa.

³⁰Sasaibino komian babasal naikon somba doi salaano, sasaibino kobangkapi biasa naikon somba mososubayo yana.

³¹Kotabo-tabo doibundu naikon bakaleda doi TEMENENO, yana naikon binasalitakon polong doi natulunan-tulunan.

³²Doi bangsa mososuung doi bundu naikon binabilitakon baikon ko TEMENENO lapamo salamatene konyanyian.