Read Banggai SADEONG 27 Bible Online

SADEONG 27 - Banggai bible

SADEONG 27

¹Daud na Sadeong. Ko TEMENENO doiyamokai daku madialan tukon daku kasalamatan, akiyo daku minatakuton ko TEMENENO doiyamokai daku benteng soopan, yaku aki naikon kulolondong.

²Kalu yaku linobosi mian molokis moyase akateyo yaku, yanila mokai komo takait tukon otuwong.

³Maukai kulinobosi pasukan mobabasal, yaku aki kumatakut. Maukai nateali kopolobosian molawanaku, yaku tataap moini.

⁴Tolongo meeng daku kinabi doi TEMENENO, tolongo naiyamo daku minooton; dungol doi TEMENENO Na Bonua sampe pomatekon, sulano kulakukene ko TEMENENO namonondokan tukon makabi napololaing.

⁵Ko TEMENENO osoopaku doi tempo kasulitanan; yana sookanaku doi nabonua lalomo, tukon bingkataku doi bunggul batu bunggono.

⁶Bododoiya yaku manaang luwedoi kumusuh motikumaku; maka tukon kokuweis laba yaku sosubakene kososubakon sukuur doi Mu Bonua yaku yase manyanyi tukon nggaale ko TEMENENO.

⁷Oh TEMENENO, lengelekai kalu kuuwang doi-Koo, mamaasikanakukai tukon timbiliyakukai!

⁸Ikoo bantile, “Lubatokai mososubai Yaku?” Yaku timbiliyo, “Yaku soisobit lubat, oh TEMENENO;

⁹inaikai basookon luwedoi yaku.” Inaikai monggimal tukon tolake komuata, sabab Ikoomokai komo lapamo tulungiyaku. Inaikai moaisene kai natingkalaku, oh Mian Bisa, mosalamatanaku.

¹⁰Maukai tama tukon tina natinggalaku, ko Mian Bisa naikon pialaaku.

¹¹Tudoikanakukai komu mongiasan, oh TEMENENO, tuntunakukai doi loloon momoliyous, sabab daku musuh todudul badaang.

¹²Inai mosalakangganaku doi kumusuh namongiasan, molubotiiyaku tukon kala-kala tukon molawanaku.

¹³Yaku anggayo naikon motoupiyo ko TEMENENO namonondokan doi kutuboan lalomo nai dunia nia.

¹⁴Moinikai doi TEMENENO, kabukuanggenekai tukon ekenggelekai konoamu; oh, moinikai doi TEMENENO!