Read Banggai SADEONG 31 Bible Online

SADEONG 31 - Banggai bible

SADEONG 31

¹Tuuk mokatuaiyo konyanyian. Daud na Sadeong.

²Doi-Koomokai daku soopan oh TEMENENO, inai mosobiiyaku kubinee maa. Salamatanakukai tukon Mukaadilan.

³Longolakukai tukon sobiiyakukai soisobit Tealikai doiyaku buno bunggul batu lipu kusoopan, pokakana kobenteng momonggol, doiyamokai daku salamatan.

⁴Oh, Ikoo pokakana kobunggul batu tukon benteng momonggol tuuk doiyaku! Komu perjanjian Ikoo taaniyaku.

⁵Luputanakukai luwedoi talong mokinonoikon doi yaku, sabab tongo Ikookai daku basoopanan.

⁶ Doi limanu lalomo daku salakangganano kobutonggu Ikoo sobiiyaku, oh TEMENENO, Mian Bisa motataap, lakukene konaperjanjian.

⁷Komian mososubaiyo kopilogot yaku mosikitene; bai yakunia maangga doi TEMENENO.

⁸Yaku naikon laba-laba tukon tetedes sabab Ikoo tataap seseangaku. Ikoo kitayo daku sakisawan tukon perhatikanggene daku kasusahan.

⁹Aki mubatadikanaku kutinaan musuh, bai ikoo moolakanaku kuampakon aman.

¹⁰Mamaasikanakukai, oh TEMENENO, sabab yakunia doi susaan lalomo; komatanggu meele sabab yaku kokiil, kobutonggu sakisaa.

¹¹Daku tubowan kabus doi sakisawan lalomo, daku taun-taun tolupai doi susaan lalomo. Daku bukuwanan lapus kobailon sabab kulokisan, tukon koidan kobuku-bukunggu teali moloto tukon mapasa.

¹²Sasaibino daku musuh teali taanaku, tukon koidan doi sasaibino daku pokolanikonan bonua. Sasaibino daku potingoniiyan ngginggim kalu kitaaku, yanila bulen kalu pososuung tukon yaku doi loloon.

¹³Yaku tinoliminggono pokakana komian momate, tukon teali buno lolonggu moinaison.

¹⁴Doiya-yando konadanoan kokasilakaan; yaku lengele kobilitano daku musuh yanila pomeenggon molawanaku, tukon mokubai tetel moakateaku.

¹⁵Bai yaku moini doikoo, oh Temeneno, sabab ikoomokai daku Mian Bisa.

¹⁶Ikoo sidutu pialaaku, salamatanakukai luwe doi kumusuh-musuh, tukon luwedoi mian-mian mololongganaku.

¹⁷Boliisi mupokokonoi doi muata; salamatanakukai tobikon museang.

¹⁸Inai pataikanaku kumalaat maa, oh TEMENENO, sabab yaku uwang doi-Koo. Batadikenemokai komian molokis nainakamaa, tukon aki nabiyok-biyok bulus doi mian mate nalipu.

¹⁹Kosokiyo kobabano sasaibino komian mobakala-kala motukon babanggaal bapitanaakene komian momoliyous konoano.

²⁰Bukamaen konalobianan Komu monondokan Ikoo masadiakene doi mian motulut-tulutan! Sasamba komian kitayo kona monondokan Ikoo molakukene, doi yanila mosoop doi-Koo.

²¹Ikoo seekene yanila doi Musoopan lalomo motuuk koakakanano komian molokis; Ikoo dagaiyo yanila doi Musoopan lalomo motuuk doi mian molokis napalait.

²²Ngginaalai ko TEMENENO! konamaasi tealikene yaku masainding, doi tempo kulinubotiiyan tukon kulinobosian.

²³Doi kupusingan lalomo yaku aanggene ko TEMENENO aisanakumo luwedoi salaano. Bai yana lengelemo daku kakabi doi tempo kuuangan doiya-Na.

²⁴Kilakenekai ko TEMENENO, eh sasaibino Konamian, ko TEMENENO eseepe komian motulut-tulutan. Bai komian mobabanggaal Yana ukume tukon aki nakala-kala.

²⁵Kabukuanggenekai tukon ekenggele konoamu, komuyu sasaibino momoini doi TEMENENO!