Read Banggai SADEONG 33 Bible Online

SADEONG 33 - Banggai bible

SADEONG 33

¹Eh mian-mian moliyous, mokokuweis tedes sabab oila komolapamo TEMENENO lakukene; siokai komian moloyos konoano nanggaale.

²Basukuurkai doi TEMENENO tukon kacapi, pomanyanyikai doiyana tukon linolaing musiik.

³Mananikenekai kokuboiyon boolu doi TEMENENO, maenggene kacapi monomonondok tukon kokuweisai tukon laba!

⁴Sasaibino ko TEMENENO nabantilan moola inangga; yana tulut-tulutan doi sasaibino kona kokubai lalomo.

⁵Yana kilakene komian moloyos konoano tukon kokaadilan; posaapon kolipu moono tukon naseang.

⁶Ko TEMENENO beena parentah, maka kotimbu tapasitaka; koaloyo matano, bituwon tukon bituwon pauno Yana tealikene tongo nabantilan.

⁷Sasaibino kopaisu tobun Yana pototongikene doi meeng kolipu, kotobun dapango Yana taane doi meeng kobendungan.

⁸Batadikenekai posaapon komian doi dunia namatakutene ko TEMENENO tukon podungoli dunia odotiiyo yana.

⁹Sabab Yana tongo bantil, maka sasaibino tealimo; Yana mebee palenta, maka sasaibino daanomo.

¹⁰Ko TEMENENO akiyenggene kobangsa-bangsa natetel, Yana akiyenggene konapo niat.

¹¹Bai ko TEMENENO natetel tataap bataanggon, Konatetel monggol popuson koloonu.

¹²Kinatawankai kobangsa mo akiyo kona TEMENENO salaku na Mian Bisa, kinatawankai komian Yana molilikemo motealimo koona.

¹³Luwedoi surgaa ko TEMENENO mbalenge doi bilit, tukon Yana kitayo sasaibino kobangkapi.

¹⁴Luwedoi Nabatomundoan ko TEMENENO kita-kitayo sasaibino komo dungoliyo kodunia.

¹⁵Yanamokai komo kubaiyo konoanoila, tukon toiyo sasaibino konapo kokubai.

¹⁶Kotomundo aki namanaang maukai nabadaang konasuludadu, kosuludadu aki nasalamat maukai napobukuan.

¹⁷Koadalan aki namoola minoinikon momanaang, konabukuanan tuuno aki namoola salamatene.

¹⁸Ko TEMENENO dagaiyo komian-mian motulut-tulutan momoinikene Konamaasi.

¹⁹Yana salamatene yanila luwedoi matean, tukon otuboiyo yanila doi tempo malalaan.

²⁰Maka kita moini doi TEMENENO, Yanamokai kopotulung tukon ndapebela.

²¹Kita laba-laba tuuno sabab Yana tukon maanga doisambu-No momoliyous.

²²Boliisi Mutataap seseanggami, oh TEMENENO, sabab kami tongo moini doi-Koo.