Read Banggai SADEONG 34 Bible Online

SADEONG 34 - Banggai bible

SADEONG 34

¹ Daud na Sadeong, salataa yana kakadukon tindo doi Abimelek salaano sabab kona pikikanano napo doiya yana siniika maka nataus.

²Yaku yase basukuur doi TEMENENO sasamba kotempo, tukon aki kutade-tade monggaale Yana.

³Yaku yase babanggaal sebab TEMENENO nakokubai; boliisi komian mopinipiik napo lengele tukon laba-laba.

⁴Kabasalekai ko TEMENENO tukon yaku, mai ndaposinggat-singgat mokabasale Kosambuno.

⁵Yaku sambeang doi TEMENENO, tukon Yana timbiliyo, tukon sobiiyaku luwedoi sasaibino komatakutan.

⁶Komian mopipiike moini doiya-Na tukon laba-laba, akiyo konapo alasan sulano napoteali mamaa.

⁷Komian motinepaki silakaan uwang tukon TEMENENO timbiliyo, tukon sobiiyo yana luwedoi sasaibino konakasulitan.

⁸Ko TEMENENO Namalaekat dagayo komian matakutene ko TEMENENO, tukon sobiiyo yanila luwedoi silakaan.

⁹ Lasakanggene susuumu bulaando kona monondokan ko TEMENENO, kinatawankai ko mian mosoop doiya-Na.

¹⁰Poodotiiyokai ko TEMENENO, eh komuyu Konamian, sabab komian matakutene ko TEMENENO aki nakakulangan.

¹¹Kosinga-singakai malaal sabab akiyo konakinaan; bai komian mososubayo ko TEMENENO aki nakakulangan.

¹²Lengelekai, eh labuk-labuk sasaibino, yaku otunggule komuyu moodotiiyo ko TEMENENO.

¹³ Komuyu yasekai nabulusan kopo umur tukon polasaiyo komo monondok?

¹⁴Inai motobuatene ko bantilan-bantilan molokis, tukon inai poiyase naikon kopandoiyan bakala-kala.

¹⁵Dedenggenekai komo lokis, lakukenekai komo monondok, kakatekenekai kopodamean tukon tutuu.

¹⁶Ko TEMENENO perhatikanggene komian moliyous, Yana lengele kalu napo nggeleamon makabi tulung.

¹⁷Bai komian mokubai lokis Yana nggimoliiyo; kalu yanila mate, yanila mosobit tinoliminggon.

¹⁸Kalu komian moliyous uwang, ko TEMENENO ndongoliyo, tukon salamatene yanila luwedoi sasaibino kokasulitan.

¹⁹Ko TEMENENO loolani doi mian mopoi-poisike konoano; Yana salamatene komian moloto konoano.

²⁰Badaangkai komian monondok nasakisaa tinoupi bai ko TEMENENO sobiiyo yana luwedoi sasaibino.

²¹ Kobutongo tataap dinagai TEMENENO, luwedoi bukuno akiyo komeengkai komo linoto.

²²Komian molokis naikon mate sabab nakulokisan, komian momosikitene komian moliyous naikon inukum mate.

²³Ko TEMENENO salamatene Konaata-ata; komo soop doiya-Na aki naikon nainukum.