Read Banggai SADEONG 35 Bible Online

SADEONG 35 - Banggai bible

SADEONG 35

¹Daud na Sadeong. TEMENENO, lawanekai komian molawanaku, lobosiyokai komian mo lobosiyaku.

²Alayomokai kotombide-tombide poipoisik tukon Komu tombide pinake, tukon kokondongkai tulungiaku.

³Bingkatekai kokalait palus tukon Komu kalait, tuuk molawane komian mololongganaku. Bantilekai doi yaku baikon Ikoo kupasalamat.

⁴Batadikenemokai komian moiyase akateaku napo linunggui tukon inakamaa. Batadikenemokai komian momokubai pototongian mokalipookan nalawanaku yanila abali tukon pusing.

⁵Batadikenemokai napo inasu TEMENENO Namalaekat, pokakana kolabuwe kulito mobineaason mbombuul.

⁶Batadikenemokai napolinolonggon TEMENENO Namalaekat, doi lalom mokalipookan tukon molondol.

⁷Palasuma yanila motalongganaku kai makali bitu sulano napo lakowaku.

⁸Batadikenemokai napo tinepaki balaa tukon aki natinoiy-toiy. Batadikenemokai nopotositak doi napo talong lalomo maka nopotuwong tukon mate.

⁹Tobikon doiya yaku labalaba sabab TEMENENO, konoanggu tedes sabab Yana salamatanakumo.

¹⁰Tukon tootubo konoanggu yaku bantile, “TEMENENO, Ikoo akiyo komubunoan! Ikoo sobiiyo komo aki nabukuan luwedoi mobukuan, komo talalais tukon sakisaa luwedoi napinipiikan.”

¹¹Kosakisii-sakisii molokis kokondong lawanaku, tukon tuduwaku molakukene kolangge-langge moaki kutoiyo.

¹²Dakumonondokan yanila telese tukon kolokisan; yaku tuwung tukon tanggalaup doi molotoan konoanggu lalomo.

¹³Doi tempo napo masakitan, yaku susa tukon aki kukaan; yaku sambeang tootukunggene koolunggu,

¹⁴pokakana yaku masambeanggon komeeng koutus kai meeng kosobat molapat tuuno. Yaku tootuku mokokiiliyo yanila, buno yaku mosusakene kotinanggu susunggu.

¹⁵Bai doi tempo kususaan, yanila sanaang, tukon yanila pototongi molawanaku. Yanila ambakon nggebok-nggebok tuuk mototulaiyaku.

¹⁶Yanila banggadudul mopia-piadayo komeeng komian molemat tukon mbalengaku tukon mosikit.

¹⁷Polong oila kotempono, oh TEMENENO, polong oila kotempono Ikoo tongo mbalenge tolong? Salamatanakukai luwedoi napo balobosian, oluputekai kobutonggu luwedoi singa-singadoo.

¹⁸Maka yaku naikon basukuur doi-Koo doi Mumian tanga-tangano, tukon yaku nggaale kosambu-Mu doi napo sosungan lalomo.

¹⁹ Inai mobatadikanaku kuminaenggon luwedoi mian momusuwaku bai akiyo kona sabab. Inai batadikanaku kukinokuweisi luwedoi mian momosikitanaku bai akiyo konapo alasan.

²⁰Konapo silingan aki namalamuyuk; yanila batetelikene kobatipuan motuuk doi mian motubo monondok.

²¹Yanila wowokon doiyaku tukon bantile baikon yanila kitayomo daku kokubai.

²²Bai Ikoo, TEMENENO, kitayomo, naikai batingakon, oh TEMENENO; naikai mododoonggon luwedoi yaku.

²³Kokondongkai belayo daku palakala, oh daku Mian Bisa tukon ku TEMENENO, tulungiakukai!

²⁴Belaakukai, sabab Ikoo adil, oh TEMENENO, daku Mian Bisa, inai batadikene komusuh nakokuweisiyaku.

²⁵Inai batadikene napo bantile doi noano lalom, “Sukuur, lapamo akabuse kona ansangan. Konda mongiasan kita latemo!”

²⁶Batadikenekai komian mosanaang napo kitayo daku sakisawan yanila teali pusing tukon malaat maa. Batadikenemokai komian mo babanggaakene kobutongo doiyaku tinotulai tukon inakkamaa.

²⁷Boliisi komian moyase kitayo daku binisakonan yanila wokon tukon laba-laba. Boliisi napo sula-sulaiyo konapo bantilan, “Tutuu babasalkai ko TEMENENO! Yana yase tuuno sulano Kona ata salamat!”

²⁸Tukon yaku naikon babilitakene Komu adilan, tukon yaku nggale Ikoo sasamba kooloyo.