Read Banggai SADEONG 37 Bible Online

SADEONG 37 - Banggai bible

SADEONG 37

¹Luwedoi Daud. Inai moiyos konoamu sabab mian molokis, inai momasakit konoamu doi mian mokubai salah.

²Sabab yanila mosobit lapus pokakana kobulung, tukon moloiyu buno lobo sinakakon manampal koloono.

³Maanggakai doi TEMENENO, tukon lakukenekai komo monondok, dungolokai doi lipudoo tukon ikoo sio mutulut-tulutan.

⁴Umboliyokai komu sanaangan doi TEMENENO, Yana naikon akambule konoamu namongiasan.

⁵Salaakanggenekai komu tuboan doi TEMENENO, moinikenekai doiya-Na, Yana naikon tulungiyo ikoo.

⁶Yana naikon okitakene komu tulut-tulutan pokakana komadialan, tukon kona moloyosan konoamu pokakana kooloyo.

⁷Totiiliyokai ko TEMENENO tukon noa motanaang, totiiliyokai tukon sabar doi nakubaiyano Konatindakan. Inai mopopusinggon komian monondok kona tuboan, kai komo lakukene kobatipuan.

⁸Inai monggimal tukon monas konoamu, doiya tongo babayo kosilakaan.

⁹Sabab komian momokubai lokis naikon inalapus, bai komo moini doi TEMENENO naikon pusakaiyo butadoo.

¹⁰Komian molokis naikon lapus tukon soisobit, kalu yana inumbal, yana akiyono.

¹¹ Komian moekependeyo konoano naikon pusakaiyo butadoo, tukon yanila lasayo kokasanangan molobi-lobian.

¹²Komian molokis mokubai tetel molokis motuuk doi mian monondok, tukon nambalenge yana tukon mosikitene.

¹³Bai ko TEMENENO kokumbite komian molokis, sabab Yana toiyo domianoo lolanimo kona silakaan.

¹⁴Komian molokis bubute kona sabel tukon konoikene kona panah sulano nakateyo komian motalalais tukon mosakisaa, tukon koidan natembele komian motubo monondok.

¹⁵Bai komian molokis naikon totiik tukon nasabel susungo, konapo panah batango naikon linoto.

¹⁶Komian momonondok soisik kona lolonggu lobian koanggano tukon doi mian molokis koona badaang tuuno.

¹⁷Sabab komian molokis nakuasa naikon ko TEMENENO lotoyo, bai komian monondok Yana eseepe.

¹⁸Ko TEMENENO dagaiyo komian moliyous natuboan, konapo buat pusaka tataap sidutu-posiditukon.

¹⁹Doi tempo kasulitanan aki naikon naposakisaa, doi tempo malalaan konapokinaan naikon lobi-lobian.

²⁰Bai komian molokis naikon silaka, ko TEMENENO namusuh naikon lapus pokakana kobubunga doi padang, yanila naikon lapus doi tibolung lalomo.

²¹Komian molokis babinggat tukon aki naabaliinggene, bai komian monondok mebee tukon sanaang konoano.

²²Komian TEMENENO mobalakaatiyo naikon pusakaiyo butadoo, bai komian mokinutuk Yana naikon siniika.

²³Ko TEMENENO tuntune komian doi loloon mosio nalinoloi, Yana ekenggele komian konatuboan mopokokonoi doiya-Na.

²⁴Kalu tuwong, yana aki naikon nababasal konapakol, sabab TEMENENO taaniyo kolimano.

²⁵Salataa kutabokonan polong kumotuaan, akiyoon kumokita ko TEMENENO motinggale komian monondok, kai konapau tumbu moteali mian mobakai-kabi.

²⁶Yana sidutu binggotiiyo lobo kotulano tukon mebee, tukon konalabuk-labuk teali balakaat doiyana.

²⁷Tinggale komo lokis, lakukene komo monondok, maka polong sidutu-posidutukon komu katulunan dungoliyo butadoo.

²⁸Sabab ko TEMENENO yase kokubai monondok tukon adil, komian mosetia doiya-Na napataikene mosakisaa. Bai Yana lindungiyo yanila sidutu-posidutukon, tukon komian molokis nakaturunan makabus.

²⁹Komian moliyous naikon pusakaiyo butadoo, tukon dungoliyo polong sidutu-posidutukon.

³⁰Komian momonondok basilingan tukon pandoian, yana sidutu moloyos doi nabantilan-bantilan lalomo.

³¹Kona Mian Bisa naukum tangabos doi noano lalomo, yana aki naisa luwedoi yana.

³²Komian monondok minata-matai luwedoi mian molokis, momoumbolii todanan sulano naakateyo.

³³Bai ko TEMENENO aki nabatadikene yana tuwong doi musuh limano, kai inukum doi tempo nainadilian.

³⁴Moinikenekai doi TEMENENO tulutiyo kai Konapalenta, maka Yana bingkate ikoo sulano pusakaiyo butadoo; ikoo naikon kitayo komian molokis moinalapus.

³⁵Yaku sidutu kitayo komeeng komian molokis moiyase babanggaal; yana pokakana kokayung batango momolumbano tukon koalono atean tuuno.

³⁶Doi tempo kualonan, yana akiyono koidan, yaku umboliiyo yana, bai aki kulaate.

³⁷Palatikanggenekai komian monondok tukon moloyos konoano, komian moiyase dame malaat tubowan monondok doi salaando.

³⁸Bai komian baladosa naikon inakate kabus; konapo katulunan naikon inalapus.

³⁹Ko TEMENENO salamatene komian moliyous, tukon eseepe yanila doi tempo kasulitanan.

⁴⁰Yana tulungiyo tukon salamatene yanila, tukon olupute yanila luwedoi mian-mian molokis sabab yanila soop doiya-Na.