Read Banggai SADEONG 38 Bible Online

SADEONG 38 - Banggai bible

SADEONG 38

¹Daud na Sadeong doi tempo namososubakonan sosubakon baingotiian.

²TEMENENO, inai moukumaku doi Munggimalan lalomo, inai mosakisaaku doi Munggimalan lalomo.

³Komupana taduke pakoloniyo kobutonggu, yaku rasayo babalat kolima-Mu Mudodokanano.

⁴Yaku masakit tuuno sabab Munggimalan; akiyono komosehat doi butonggu sabab daku lalim.

⁵Yaku tanggalaup doi lomba lalomo luwe kukasalahan, daku dosa tinanggung tududul motoong doi yaku.

⁶Dakupakol-pakol bananah tukon booan koboono, sabab yaku kubaiyomo kobodoan.

⁷Yaku tootuku tukon tapaku, sasamba kooloyo yaku murung tukon susa.

⁸Sesel onas suwayo kobutonggu, akiyo komo sehat doi butonggu.

⁹Yaku moonas tuuno tukon kabuso kobukunggu, yaku mongoluu sabab konoanggu susah.

¹⁰TEMENENO, Ikoo toiyo sasaibino dakuminoton, dakususaan aki natosookon doi-Koo.

¹¹Kopupulosonggu ponding-ponding, kobukunggu kabus, komatanggu akimo natalaang.

¹²Kopuli-pulinggi dambas sabab kusesel, tukon koidan daku sobat-sobat dudungganakumo.

¹³Komian moiyase akateaku yanila talongganaku; komo yase silakaaku yanila lubotiiyaku sulano napo akateaku.

¹⁴Bai yaku buno mian mobongol moaki namolongol, pokakana komian moponga moaki nabasilingan.

¹⁵Tutuu, yaku pokakana komian moaki namolongol; tukon tobikon doiya aki kututumbake.

¹⁶Bai yaku moini doi-Koo, oh TEMENENO, tukon Ikoo, TEMENENO ku Mian Bisa, timbiliyakukai.

¹⁷Inai batadikene daku musuh tongo sanaang mokitayo dakususaan, inai pataikene napo babanggaal kalu daku manggaan tounggoto.

¹⁸Yaku adukono tuwong, banggadudul momeenggon yaku seselon.

¹⁹Yaku akiyo daku lalim-lalim; konoanggu susah mopikikene daku kasalahan.

²⁰Komian-mian momusuwaku badaang tukon bukuwan, yanila mosikitene bulaando daku kubaiyano dakutuboan.

²¹Komian mobalese komonondokan tukon kulokisan momusuwo yaku sabab yaku lakukene komo monondok.

²²Oh TEMENENO, inai motinggalaku, inai mododoongon doi yaku, oh daku Mian Bisa.

²³Lubatokai soisobit Mutulungiaku, oh TEMENENO daku pasalamat.