Read Banggai SADEONG 39 Bible Online

SADEONG 39 - Banggai bible

SADEONG 39

¹Tuuk mokatuiyo konyanyian. Daud na Sadeong. Tuuk doi Yedutan.

²Kupikikene, “Yaku yase modagaiyo kobutonggu sulano naaki kubaladosa tukon aleponggu. Yaku aki kuyase basilingan kalu komian molokis danoon mololani.”

³Yaku aki kubiok sololoon kobahasa, tobikon kabaiyo lugi kobutonggu susungo. Tukon daku kasusahan kulasayo pololokon motoong;

⁴sabab kumatakutan mohebat pokakana yaku motinitiiki. Pololokon pinikikon, pololokon susah, ko noanggu; konapupusan yaku bantilekai.

⁵“TEMENENO, pailukanakumokai oila kotempono daku matean sulano kutoiyo bulaando konapependean daku tuboan”.

⁶Bulaando konamosobitan Ikoo tantukene daku umur! Doi-Koo kona kalumbit dakutuboan akiyo koalatino. Tutuu, kobangkapi natuboan doi dunia tongo pokakana koansaangan idan tolong,

⁷konatuboan lapa pokakana kobayangan. Sasaibino kona sinibukon akiyo kotakoso; yana mangatambun buat, bai aki natoiyo indee naikon komopakeyo.

⁸Budodoiya oilamo daku tinotiili, oh TEMENENO? Doi-Koomokai dakumoinian.

⁹Sobiyakumokai luwedoi sasaibino daku dosa, inai batadikanaku teali totulai doi mian bonggu.

¹⁰Yaku batingaakon tukon aki kubukayo kobabanggu, sabab Ikoomokai komo umbasaku.

¹¹Alayokai Komu ukuman moluwe doi yaku, sabab adukon kumate sabab Mupopukul.

¹²Kobangkapi sabab nakasalahan, Ikoo ukume tukon nanale pokakana koatak Ikoo momanase oila komo daano koolino doiyana. Tutuu, kobangkapi motubo doidunia tongo buno ansaangan idan tolong.

¹³Lengelekai daku sambeang oh TEMENENO, perhatikanggenekai daku kakabi; inai motongo dungol batingaakon kalu yaku kokiil. Pokakana sasaibino dakumbumbu, tongo naapadoiya tolong daku manumpangan doi-Koo.

¹⁴Inai mogangguaku, sulano kusanaang soisik, moakiyon kuampakon tukon yaku akiyono koidan.