Read Banggai SADEONG 51 Bible Online

SADEONG 51 - Banggai bible

SADEONG 51

¹Tuuk mokatuaiyo konyanyian. Daud na Sadeong kinarang

² sambuno lapa Nabi Natan anukene yana sabab moposelekon tukon Betsyeba.

³Mamaasikanakukai oh Mian Bisa, sabab Ikoo tataap meseseang, apusekai daku lalim sebab Museang mobabasal.

⁴Bilisiiyokai sasaibino daku kulokisan; bilisiiyokai luwedoi kulalim.

⁵Sabab yaku akuiyomo daku kasalahan-kasalahan, daku lalim sidutu kune-neeke.

⁶ Tuuk doi-Koo, tuuk doi-Koo tolong yaku baladosamo, tukon komu inanggon lokis yaku lakukenemo. Tobikon doiya pantaso Muukumaku, adilokai Komu kaputusan.

⁷Konatutuwan, daku kulokisan salataamo doi kusinungan, tukon kanakono lalim salataa doi kutiniananggonan.

⁸Ikoo tuntute konamoloyosan komian noano; koonoiyokai konoanggu tukon Mumaasi.

⁹Koliyousiyakukai, sulano naikon kubilisii; kumesiyakukai, sulano kuteali moute liisiyo kokapos.

¹⁰Sobiiyakumo molongol bilita lalabaan, sulano konoanggu Ikoo moakamanasemo nia teali lalaba koidan.

¹¹Abalinggenekai kodudusoMu luwedoi kulalim-lalim, tukon apusemokai sasaibino daku kasalahan-kasalahan.

¹²Pasitakayomokai konoa molino doiyaku, oh Mian Bisa, kiboluwekai konoanggu tukon samangat mo bukuan.

¹³Inaikai mosakukanaku luwedoi salaa-Mu, tukon inai moalayo Komuroh moliyous moluwe doi yaku.

¹⁴Kubaiyakukai laba-laba koidan sabab kasalamatan moluwe doi-Koo, benggukai noa monondok sulano kutulut-tulutan doi-Koo.

¹⁵Maka yaku naikon otunggulikene Komuparentah doi mian baladosa, sulano napoabali doi-Koo.

¹⁶Oluputakukai doi matean, oh Mian Bisa dakupasalamat, maka tukon laba-laba yaku naikon babotilanggene Komu kaadilan.

¹⁷Oh TEMENENO, tulungiyakukai basilingan, sulano yaku ngganggaale Ikoo.

¹⁸Ikoo aki muyase kososubakon motinembel; kalu andeno yaku mososubakon sosubakon mosinua, Ikoo aki mukilayo.

¹⁹Kososubakon doi Mian Bisa siokai noa momanasal tuuno, noa momanasal tukon badodoloon aki Mutoiyo.

²⁰Oh Mian Bisa, tudoikenekai Komumonondokkan doi Sion, bangunekai kokoidan ko Yerusalem pagal-pagalo mobineton.

²¹Maka Ikoo naikon pokokonoi motalimayo kososubakon mominoolakon, sosubakon mosinua tukon sosubakon mobisa kosaapi langgilo naikon sinosubakon doi balabaan bunggono.