Read Banggai SADEONG 59 Bible Online

SADEONG 59 - Banggai bible

SADEONG 59

¹ Tuuk mokatuiyo konyanyian. Loingiyo kolagu: Inai moakabuse. Sadeong moluwe doi Daud, doi tempo Saul mosumbolii mian mototooliyo konabonua sulano nainakate yana.

²Oh daku Mian Bisa, salamatanakukai doi kumusuh-musuh, osoopakukai luwedoi mian molubotiiyaku tukon molawanaku.

³Oluputakukai luwedoi mian mokubaiyaku lokis, oluputakukai luwedoi mian momangakate.

⁴Kitayo, yanila todongaku tukon yase moakateaku, komian-mian nakokubai molokis yanila posumbolii momalawanaku; padahal bolikon sabab kumokubaiyan lalim kai lakukanggene kopalanggalan, oh TEMENENO.

⁵Bolikon koidan sabab kukasalahan, yanila bato-batotobo tukon basa-basadia.

⁶Mian Bisa Mo Tatandak Tuuno, kokondongkai, tulungiyaku. Oh Israel na Mian Bisa, sakisiiyokai susuumu. Bangunkai tukon ukumekai kobangsa-bangsa, inai moseseange komian molokis moakiyenggene Ikoo.

⁷Doi tempo kooloyomatano nasopokan yanila abali, todung-todung pokakana koasu tukon yanila boilingiyo kokota.

⁸Yanila basindir momeenggon tukon batotulai; konapo bantilan-bantilan mamangan pokakana kobakoko, yanila anggene akiyo komo lengele.

⁹Bai Ikoo kokumbite yanila, oh TEMENENO, sasaibino dobangsadoo Ikoo totulaiyo.

¹⁰Ikoomokai dakumonggolan, yaku moini doi-Koo, Ikoo daku lipu dampasan, oh Mian Bisa.

¹¹Sabab monondokan daku Mian Bisa lubat doiyaku, Yana batadikanaku mokita dakumusu molinunggui.

¹²Oh TEMENENO, inaikai moakateyo yanila, sulana dakubangsa aki natomilinggene. Poalaasenekai tukon lungguyokai yanila tukon Mukuasa, oh TEMENENO mai soopan.

¹³Sabab yanila baladosamo tukon napo bantilan-bantilan; batadikenemokai napo tosintak doi napo babanggaalan lalomo, sabab yanila yase mongutuk tukon bakala-bakala.

¹⁴Oh TEMENENO doi Munggimalan lalomo akabusemo yanila, yanila sasaibino sio Muakabuse. Sulano sasaibino komian yanila toiyomo baikon ko Mian Bisa maparentamo doi Israel, tukon Kona bapamarentaan luas posaapon kodunia.

¹⁵Doi tempo nasopokan kooloyomatano yanila abalimo, todung-todung pokakana koasu tukon boilingiyo kokota.

¹⁶Yanila lausala momubolii kinaan, tukon dadaluuwang kalu aki nabobosul.

¹⁷Bai yaku manyanyikene tentang Komubukuanan; sasamba kodowa-dowa yaku manyanyi tukon babasal koalalonggu tentang seang tukon Mukasetiaan. Sabab Ikoomokai dakulipu dampasan, lipu kusoopan doi tempo susaan.

¹⁸Oh Mian Bisa, dakumoonggalan, yaku manyanyikene kongganggaalano doi-Koo, sabab doi Ikoomokai dakulipu soopan, oh Mian Bisa, yaku mamaasikene.