Read Banggai SADEONG 68 Bible Online

SADEONG 68 - Banggai bible

SADEONG 68

¹Tuuk mokatuaiyo konyanyian. Daud na Sadeong doi Temeneno.

²Ko Mian Bisa kokondong mopobabandakene Konamusuh, komian mosikitene Yana bulen luwedoi salaano.

³Ko Mian Bisa sikayo napo taus, pokakana kotibolung mopinuul tukon lapus. Pokakana kolilin moee doi bilat lalomo, bunodoiyakai konalapusan komian molokis doi Mian Bisa salaano.

⁴Bai komian mo moliyous yanila labalaba tukon tedes tuuno, yanila kokuweis-kokuweis lalabaan doi Mian Bisa salaano.

⁵Pomanyanyikai doi Mian Bisa, ponggaalekai Kosambuno, posadiayo kololoon mobabasal doiya-Na sabab Yana molakiti bunom. Kosambuno TEMENENO sabikon doiya pobasanangkai doi Salaano!

⁶Ko Mian Bisa modungol doi Na Bonua mo moliyous yana daanokai pau-pau motuboon tamano tukon komobelayo sasaibino kobalu-balu.

⁷Doi mian mosusah ko Mian Bisa beena dungolan; komian motinaan Yana olupute sampe yanila sanaang. Bai komian-mian molawane ko TEMENENO sio nadungol doi buta mokindolon.

⁸Oh Mian Bisa, doi tempo muandanano Komumian ambakon loloiyo kopadang motuul,

⁹ kodunia lolondong, koudan mbelembesan doi salaamu, sebab ko Mian Bisa lubat doi Bunggul Sinai, Israel mianno na Mian Bisa.

¹⁰Ikoo lubatene koudan tukon lobi-lobian, tukon komu buta tealimo molumbang koi-koidan.

¹¹Indaamokai komian naikon kona dungolan, oh Mian Bisa, doi Mumonondokan lalomo, Ikoo pialayo komian motalalais.

¹²Ko TEMENENO mebee parenta, sulano sasaibino koboine namababa bilita:

¹³“Kotomundo-tomundo tukon kona suludadu lapamo bulen!” Yanila bulen buno lapatiing mobenga taus. Sasaibino koboine modungol doi bonua yanila ebe-ebese, kosuasa tukon mosoni yanila motinggale. Maukai nabadaang komo aki namalaing polobosi; bai ko Mian Bisa namian lapamo malaat kamanangan.

¹⁵Salataa Komo Babasal Konakuasa salakanggene kotomundo-tomundo indaa, maka luwedoi Bunggul Salmon buluskai kosalju.

¹⁶Kobunggul Basyan daanokai meeng kobunggul mohebat, bunggul mobadaang kobunggul-bunggulo.

¹⁷Bulando luwe doi mubunggul-bunggul mobadaangoo ikoo mbalenge komian tukon masakit konoamu doi Sion Bunggulo Mian Bisa molapamo piliyo sulano nateli Nadungolan? Ko TEMENENO yase dungol indaa polong sidutu-posidutukon.

¹⁸Tukon doi moimoiya kololoono kokereta momoonggol ko Mian Bisa lubat tukon kokondong doi salanoila doi Nababasalan.

¹⁹ Ko TEMENENO liba doi lipu natatandakan; badaang komian motinaan Yana babayo. Kobangkapi nasosubakon yana komo talimayo tukon koidan doi mian moiyase nggimal yana yase talimayo; sulano napodungoli ko TEMENENO Mian Bisa.

²⁰Nggaalekai ko TEMENENO, sabab Yanamokai ko Mian Bisa mosalamatene kita, sasamba kooloyo Yana tanggunge kondatanggungan.

²¹Konda Mian Bisa yanamokai ko TEMENENO mosalamatene kobangkapi, luwedoi matean tongo yana komoolupute komian.

²²Komusuh oluno pasti naikon Mian Bisa komo manase, yaniladoo mian-mian mobanggadudul tubo doi lalim lalomo.

²³Ko TEMENENO bantile, “Eh komuyu daku mian, Yaku babayo komu musuh luwedoi Basyan Yaku babayo yanila koi-koidan luwedoi buta modaano doi tobun lalomo,

²⁴sulano mukumosiyo koaimu tukon yanila sauno, tukon komuasu-asu medelepi biya-biyai.”

²⁵Oh Mian Bisa, sasaibino komian boilingiyo kokota komo kitayo Komu kamanangan. Daku Mian Bisa, daku Tomundo, komian badaang lolainge Ikoo doi lipu Mudungolan.

²⁶Sasaibino komo manyanyi, ampakon matailuk, doi bundu sasaibino komo maenggene kokacapi, doi tanga sasaibino kopau boine mobatenge kobobolon; bunonaiyakai konapo nyanyian:

²⁷“Ponggaalekai ko Mian Bisa doi nyanyian napototongian tangano, eh sasaibino Yakub nakatulunan, nggaalekai ko TEMENENO.”

²⁸Benyamin nabenseno, doiyamo komo popoisik tuuno, tukon doiyamo komo ampakon matailuk, maka napotutundu sasaibino kokatua-katua doi Yahuda maka komo mataibundukon sasaibino Zebulon tukon Naftali nabenseno katua-katuano.

²⁹Komu bukuanan naikon mu Mian Bisa komo tuntune; oh Mian Bisa, kenggelekai oila komo lapamo Ikoo lakukene doi kami.

³⁰Ko Tomundo-tomundo mababa sosuba doi-Koo doi Mu Bonua doi Yerusalem.

³¹Sikayo ko Mesir miano, doiyayono mobarani doi galaga lalomo. Anukenekai kobangsa-bangsa, dobantengoo badaang tukon napau-pau, mo pipiike komian sulano namalaat suasa. Ko Mian Bisa pobabandakene komian moiyase polobosi.

³²Kosambu-sambu babasal doi Mesir lubat makanggi tambaga; ko Sudan miano batotobomo momababa lulu doi Mian Bisa.

³³Eh sasaibino kobatomundoan, pomanyanyikene ko Mian Bisa, manyanyikenekai ngganggalano ko TEMENENO,

³⁴tongo yana komo lupaiyo kodapang doi tempo loluk. Lengele! Ko TEMENENO basilingan, koalalo bulungan tukon lokis.

³⁵Akuiyokai ko Mian Bisa Nakuasa mobabasal mokuasaiyo ko Israel, Konakuasa polong doi timbu.

³⁶Konda Mian Bisa Nakuasa bisa-bisa minasaindinggon tuuno doi tempo Natobuatan luwedoi Nalipu dungolan. Mian Bisa Israel beena kuasa tukon bukuanan doi namian. Tanggaalakai ko Mian Bisa!