Read Banggai SADEONG 69 Bible Online

SADEONG 69 - Banggai bible

SADEONG 69

¹Tuuk mokatuaiyo konyanyian. Loingiyo kolagu: Bakung bungano. Luwedoi Daud.

²Oh Mian Bisa, salamatanakukai, sabab kopaisu libamo polong doi bulunggu.

³Yaku topolos doi lapetak moatean, akiyo kotampat bakanggian. Yaku molomos doi paisu moatean, maka kobokol lalinakumo.

⁴Yaku masa-masadai sampe pakadak tukon kobulunggu kayungo motuul. Komatanggu poloon mototiili daku Mian Bisa Nabatuan.

⁵ Komian momosikitene yaku akiyo konaalasan, lobian konakadaang luwedoi buuk doi olunggu. Komian-mian mobukuan yase kulokisene yaku; yanila nggimal bapitanaakene yaku. Yaku pinakisaa moabalinggene kobuat moaki kurampase.

⁶Ode Mian Bisa, Ikoo toiyo daku kasalahan-kasalahan daku lalim aki natosookon doi-Koo.

⁷Inai mosobiyaku molubatene komaa doi mian-mian momoinikene doi-Koo, ode TEMENENO, Mian Bisa Mo Balakuasa. Inai mosoobiyaku molubatene kosilakaan luwedoi mian-mian mososubaiyo doi-Koo, oh Mian Bisa doi Israel!

⁸Sabab Ikoomokai maka yaku tinotulai, sabab Ikoomokai maka yaku sinosibolii.

⁹Yaku teali buno mian lulubaton tuuk doi kumontolutusan, bunokai mian bailon tuuk doi utusonggu langgongo utusonggu pioto.

¹⁰ Yaku samangat tuuno sabab kukilakanano Komu Bonua, komian mototulaiyo Ikoo pisayo kobutonggu.

¹¹Yaku kokiil tukon bapuasa, bai yanila tolongo lotulaiyaku.

¹²Yaku bangotoik karung salaku palosan mosusa, bai yanila tongo sindiraku.

¹³Doi mian napototongian tongo yaku komo sinalita, pokakanamo komian momalangu nakokubai konapo manyanyikanano yaku.

¹⁴Bai yaku sambeang doi-Koo, oh TEMENENO, oh Mian Bisa, timbiliakukai doi tempo mo monondok. Tulungakukai sabab Mumaasi mobabasal tukon tobikon Mutulut-tulutanan.

¹⁵Inai batadikanaku tanggalaup doi lapetak lalomo, tobikon doiya salamatanakukai luwedoi mian-mian momosikitanaku tukon luwedoi paisu moatean.

¹⁶Inai batadikanaku kulinalin bokol mobabasal, tukon yaku teali tombul polong doi buta modaano doi tobun lalomo kai kinibul doi leng lalomo.

¹⁷Oh TEMENENO, timbiliakukai, sabab Ikoo monondok tukon tataap meseseang. Sanangkai mombalengaku sabab babasalkai Komuseang.

¹⁸Inaikai moseekene kobutomu luwedoi Muata nia, sabab yaku susah, tobikon doiya basadiakai mutulungaku.

¹⁹Lubatkai mosalamatanaku, oluputanakukai luwedoi kumusuh-musuh.

²⁰Ikoo toiyo bulaando daku piniadaan, tinotulai tukon sinangol, Ikoo kitayo sasaibino dakumusuh.

²¹Kopototulai lapamo kubaiyo moloto konoanggu, tukon akimo kutoyo oilamo daku kinubai. Kumongumbalkai seang, bai aki kumalaat, kumongumbal mian mohiburaku, bai aki kumalaat.

²² Tongo yaku binee lasum teali kukinaan; doi tempo kumolouan, yaku binee cuka sulano kuinume.

²³ Sobiyomokai konapo lamean nalubatene kosilakaan, tukon nateali talong doi mian nakinolo.

²⁴Sobiiyomokai komatanoila teali piit tukon kobukutoila namuyuk.

²⁵Kundongikenekai Komungginalan doiyanila, sobiiyomokai napotinepak Munggimalan mokolot-kolot.

²⁶ Sobiiyomokai konapo basandungan teali kiis tuuno, tukon konapo sandung-sandung akiyo komian molubat.

²⁷Sabab yanila sakisayo komian Ikoo moukume, tukon basalitakene komian-mian Ikoo mosakisaayo.

²⁸Batadikenemokai konapo kasalahan natosuungi badaang, inai molisakene yanila.

²⁹ Sobiiyomokai kosambunoila nainapus luwedoi mian motubo nabuku; tukon aki natinulis doi mian momoloyos konoano natinulisan lalomo.

³⁰Bai Yaku tataap linailainggon tukon tataap komasakitan, oh Mian Bisa, bingkatakukai tukon salamatanakukai.

³¹Maka yaku naikon nggaale ko Mian Bisa, moakabasale yana tukon nyanyian sukuur.

³²Doiya komo pokokonoi tuuno doi TEMENENO kalu baino sosubakon saapi, doiyamo sosubakon saapi langgilo mobabasal.

³³Kalu andeno yanila kitayo doiya, komian molinailainggon labalaba, komian mososubaiyo ko Mian Bisa teali babasal konoano.

³⁴Sabab ko TEMENENO lengele komian motalalis nakakabi; tukon Yana aki nabatadikene Konamian doi talunggu lalomo.

³⁵Ponggaalekai ko Mian Bisa, eh sasaibino komotubo doi timbu tukon doi dunia, tukon sasaibino komotubo doi lalomo.

³⁶Yana naikon salamatene ko Yerusalem tukon kekendenge koi-koidan kokota-kota doi Yehuda. Ko TEMENENO namian naikon dungol indaa; butadoo tealimo konila.

³⁷Konapau tumbu naikon komo pusakaiyo, komian-mian mokilayo ko TEMENENO naikon komodungoliyo.