Read Banggai SADEONG 71 Bible Online

SADEONG 71 - Banggai bible

SADEONG 71

¹Oh TEMENENO, yaku soop doi-Koo, inai batadikanaku kuinakamaa.

²Oluputaku, sabab Ikoo adil; lengelekai tukon salamatanaku.

³Tealikai doi yaku pokakana kobunggul batu daku lipu dungolan, mogampang daku laatano sidutu. Sabab Ikoo putusemo sulano musalamatanaku; Ikookai daku lipu soopan tukon sapitan.

⁴Oh daku Mian Bisa, oluputakukai luwedoi mian molokis luwedoi mian-mian molokis kona kokubai tukon moakiyo konaseang.

⁵Oh TEMENENO, Ikookai daku moinian, TEMENENO, yaku maangga doi-Koo salataa doi kutabokonan.

⁶Yaku potubokon tongo yaku sosinggalang doi-Koo; salataa yaku sosuung Ikoo osoopakumo tobikon doiya yaku nggaale Ikoo posidu-sidutukon.

⁷Daku tuboan teali sonto doi mian mobadaang, sabab Ikoomokai daku soopan mobukuan.

⁸Yaku sidutu ngaale Ikoo, sasamba kooloyo kubabilitakene Komu babasalan.

⁹Inaikai Mosakukanaku doi tempo kumotuaan inai mootinggalaku kalu daku bukuanan kabuso,

¹⁰sabab daku musuh-musuh basalitakanaku komian-mian moiyase akateaku yanila pomenggono.

¹¹Kona pobantilano, “Yana Mian Bisa tinggalemo; mai ndalelenggene tukon ndalakoyo yana, sabab akiyono komo salamatene yana.”

¹²Oh Mian Bisa, inaikai Mododonggong doiyaku, oh daku Mian Bisa, tulungakukai soisobit.

¹³Batadikenemokai komian molubotiiyaku tukon yase akateaku, napo inakamaa tukon napo inakate kabus. Batadikenemokai komian moiyase osilakaaku napo pusing tukon napo tinotulai.

¹⁴Bai yaku naikon sidutu moini doi-Koo, tukon momeenggon badaang luunggon kunggaale Ikoo.

¹⁵Sasamba kooloyo naikon yaku basalitakene Komu kokubai-kokubai moadil, tukon kokasalamatan moluwe doi-Koo moaki natangait.

¹⁶Yaku nggaale Komu kokubai motambongan oh TEMENENO Mian Bisa, yaku babontilanggene Komuadilan, Komuadilan tolong.

¹⁷Oh Mian Bisa, Ikoo otunggulakumo salataa doi kutabokonan, polong budodoiya daku basalitakanano Komu limang mominasaindinggon.

¹⁸Oh Mian Bisa, inai mootinggalaku, polong doi tempo kumotuaan tukon mbombolo dakubuuk, sulano kubabontilanggene Komu kuasa tukon Mubaranian doi sasaibino katulunan naikon molubat.

¹⁹Oh Mian Bisa, Komuadilan pokakana kotimbu konakatandakan; babasalkai Komu kokubai-kokubai; indee komo moola pokakana Ikoo?

²⁰Ikoo benggu badaang kosakisaa babalat, bai Ikoo naikon abalinggene kobukunggu tukon otuboiyaku luwedoi kibul lalomo.

²¹Ikoo naikon kubaiyaku teali inodotii lobian, tukon Ikoo hiburaku koidan.

²²Yaku yase nggaale Ikoo tukon gambus, sabab Ikoo tulu-tulutan, oh ku Mian Bisa. Yaku yase manyanyikene kopanggaal doi-Koo tukon kacapi, oh Mian Bisa moliyous doi Israel.

²³Yaku kokuweis tukon laba-laba tuuno, tukon yaku manyanyikene konggalano doi-Koo. Kobutonggu sasaibino manyanyi tukon laba-laba, sabab Ikoo salamatanakumo.

²⁴Sasamba kooloyo yaku naikon babontilanggene Komuadilan, sabab komian-mian moyase silakayo yaku lapamo linunggui tukon inakamaamo.