Read Banggai SADEONG 72 Bible Online

SADEONG 72 - Banggai bible

SADEONG 72

¹Luwedoi Salomo. Oh Mian Bisa, otunggukenekai Komu ukum doi tomundo, bekenekai Komuadilan doi tomundo namalane.

²Boliisi nahakimiyo Komumian loingiyo koukum, tukon nalakukene komian molinailainggon tongo doi naadilan.

³Boliisi komai tano namolumbang tukon nabadaang koasilo, tukon nadaano kokaadilan doi posaapon kobangsa.

⁴Boliisi kotomundo nabelayo sasaibino korayat nahak, tukon tulungiyo komian-mian motalalais tukon naakateo kabus komian-mian mo lainglainggene yanila.

⁵Boliisi natataap bataanggon polong doi nakatulunan konakalumbit kalu danoon kooloyomatano tukon bituwon.

⁶Boliisi yana nabuno udan mobulus doi padang, pokakana koudan mobabasal molombayo kokombung-kombung.

⁷Boliisi kokaadilan natataap pinake popolonggon doi naloonu, tukon kohasil nalobi-lobian kalu akiyon nakiamat.

⁸ Kona batomundowan naikon tosungi babasal luwedoi tobun polong doi tobun sembeleng, tobinggakon luwe doi oloyomatano nasumbotan polong doi oloyo matano nasopokan.

⁹Kopadang lalomo tumbuno naikon somba doiyana tukon komusuh somba doi aino salaano.

¹⁰Kotomundo-tomundo Tarsis tukon kotogong-togong naikon babayo konasosubakon doi yana. Kotomundo-tomundo Arab tukon Etiopia lubat babayo kona lulu.

¹¹Sasaibino kotomundo naikon somba doi salaano, sasaibino kobangsa naikon teali naata-ata.

¹²Sabab yana sobiiyo komian molinailainggon moakiyono kona daya, tukon mian mo talalais masadai doi yana.

¹³Yana mamasikene komian motalalais tukon korayat biasa, tukon salamatene komian mosusa natuboan.

¹⁴Yana olupute yanila luwedoi napo linailainggonan tukon luwedoi tindakan molobi-lobian, sabab konapo tuboan daano tuuno koanggano doiyana.

¹⁵Tubomokai ko Tuan tomundo! Boliisi doi yana nasinosubakon komosono moluwe doi Arab. Boliisi nasinambeanggon sasamba kotempo tukon nasinotujui sidutu.

¹⁶Boliisi kogandum nalobi-lobian doi posaapon kolipu, tukon kobunggul-bunggulo moono tukon langge-langge mosinakakon. Boliisi kobutano namolumbang pokakana ko Libanon Bunggul, tukon konakota tumbuno natosungi pokakana kobulung doi padang.

¹⁷Boliisi kotomundo sambuno natinanda sidutu-posidutukon, tukon konatololongolan natosuungi kalu akiiyon nakiamat. Boliisi kobangsa-bangsa namangkabi nabinalakaati pokakana yana, tukon sasaibino komian bantile yana sanaang.

¹⁸Tanggaalkai ko TEMENENO, Israel miano na Mian Bisa! Tongo yana komo lakukene kolangge-langge mominasaindinggon.

¹⁹Tanggaalkai kosambuno mobabasal sidutu posidutukon; boliisi naposaapon kodunia namoono tukon natanggaan! Bunomo doiya konatealian. Amin!

²⁰Polong idoo Daud nasambeang, Isai napau.