Read Banggai SADEONG 73 Bible Online

SADEONG 73 - Banggai bible

SADEONG 73

¹Asaf na Sadeong. Tutuu kai kona monondokan ko Mian Bisa doi Namian, doi mian momonondok konoano.

²Bai yaku basasakimo, dakumaanggaan adukono lapus,

³Sabab aki kusanaanggene komian mobabanggaal, salaata yaku kitayo komian molokis nakauntungan.

⁴Sabab yanila aki namasakit, kobutongoila bukuan tukon sehat.

⁵Yanila aki napo matanggung susah, aki napo tinepak kamanae pokakana komian bailonggon.

⁶Tobikon doiya yanila bangga-banggaalo, tukon sidutu yanila mokubai tindakan molobi-lobian.

⁷Luwedoi noanoila tobuat kokulokisan; yanila pasokon tukon tetel-tetel molokis.

⁸Yanila batotulai tukon bantil-bantile komian, tukon napo babanggaalan yanila lakukene sulano nalai-lainggene komian bailon.

⁹Yanila totulaiyo ko Mian Bisa doi surgaa, tukon yanila babanggaakene konapotuboan doi mian-mian badaang doi dunia,

¹⁰sampe ko Mian Bisa namiankai abali maangga doi yanila tukon yanilakai anggaemo konapoo salita mokala.

¹¹Konapo bantilano, “Ko Mian Bisa aki natoiyo, Mo Tatandak Tuuno aki namangalati.”

¹²Bunomodoiyakai kondondoongo komian molokis; konatuboan aman, konabuat sosuungi momeenggon.

¹³Tongo palasuma tolong daku dagaiyano sulano konoanggu nasidutu bilisii; akiyo kogunano daku dodongganano kolalim.

¹⁴Sasamba kooloyo yaku tongo tinepak kamanae; sasamba kododowa yaku sinakisaa.

¹⁵Kalu andeno yaku bantile bunodoiya, yaku kutukemo komupau-pau mopokakana konaumur.

¹⁶Bai doi tempo kukakaatean sulano kumangalatikene, dolanggedoo todudul maaling doiyaku.

¹⁷Konapupusan yaku usok doi TEMENENO Na Bonua, sambuno bunodoiya makanasodo kumangalatikene komian molokis napupusan konatuboan.

¹⁸Ikoo abese yanila doi loloon momolondol, tukon Ikoo tongo batadikene yanila tuwong mate kabus.

¹⁹Tongo sopiyoman tolong yanila kabus manas, kulokiskai tuuno konapo tuboan napupusan.

²⁰Pokakana koolumon molapus doi tempo dowa-dowa, salataa Ikoo kokondong, oh TEMENENO, yanilakai lapus.

²¹Salataa konoanggu aki nasanaang tukon pokakana mototiik,

²²yaku bodoh tukon aki kumangalati, yaku pokakanamo koyayon doi salaa-Mu.

²³Maukai kutataap loolani doi-Koo, Ikoo taniyo kolimanggu bakalingano.

²⁴Ikoo lolaingaku tukon otinau, tukon Ikoo talimaaku tukon pongodotii naikon.

²⁵Indee naikon dakubinakonggukon doi surgaa alasene Ikoo? Sangalaasan Ikoo akiyo daku iniyas doi dunia.

²⁶Maukai kobutonggu sasaibino nateali aki nabukuan, Ikookai daku malaatan bukuanan, oh Mian Bisa; doi-Koomokai kona lubatan saibino dakulangge polong sidutu-posidutukon.

²⁷Komian mootinggale Ikoo naikon malaat silakaan, Ikoo akateo kabus komian moaki naloingiyo Ikoo.

²⁸Bai doiyaku tutuu konamonondokan sabab yaku daano mopokolanikon ko Mian Bisa. Ko TEMENENO Mian Bisa yaku tealikene lipu soopan, sulano kumoola basalitakene sasaibino Konakokubai.