Read Banggai SADEONG 74 Bible Online

SADEONG 74 - Banggai bible

SADEONG 74

¹Asaf nanyanyian otunggul. Oh Mian Bisa, polong posidutukonkai Komu tinggalano kami? Bulando Ikoo banggadudul nggimoliiyo doi Mumian susuu-Mu.

²Neneekekai Komumian Ikoo mopiliyo salataa doi looluk, bangsa Ikoo mosobiiyo sulano nateali Koomu. Neneekekai ko Bunggul Sion, Ikoo motealikene lipu mudungolan.

³Ndelungiyokai kolipu molapamo tabaak, sasaibino komo daano doi Mu Bonua lapamo musuh manase.

⁴Komumusuh-musuh nggenggeleamon doi Mu Bonua, tukon yanila mongokkondong bandela-bandela manaangan idoo.

⁵Yanila pokakana komian momatape kayung moaakene konaolowang, momatape kayung-kayung doi babono.

⁶Sasaibino kokayung mobinotik yanila manase tukon olowang maka martelu.

⁷Yanila suwayo Komu Bonua polong mokopul, tukon tealikene manggilit Komu lipu sinosubaiyan.

⁸Yanila yase taaluukene kami sasaibino, tukon suwayo kabus sasaibino kolipu bakaledaan doi tano nia.

⁹Nabi-nabi tukon langge-langge minosaindinggon akimo natokita koidan, tukon akiyo komeengkai komian motoiyo polong oila kotempono konabanggadudulan buno naiya.

¹⁰Polong oila kotempono, oh Mian Bisa, komusuh naiya natotulaiyano Ikoo? Polong posiditukonkai konapo totulaiyano kosambumu?

¹¹Bulaando moakimo koidan Mutulungikami? Bulaando Ikoo mobatadikanggamimo?

¹²Salataa doitumbe Ikoomokai dakutomundo, oh Mian Bisa, Ikoomokai komo salamatanggami.

¹³ Tukon bukuanan mobolikon langge Ikoo batayo kotobun, tukon Ikoo pasa-pasayo konaga-naga oluno doi tobun.

¹⁴ Ikoo patele ko Lewiaten olu-oluno tukon Ikoo tealikene yana teali podungoli padang lalomo nakinaan.

¹⁵Ikoo lombakene kopaisu matano tukon paisubatango; kopaisubatango mobabasal Ikoo kotuuliyo.

¹⁶Ikookai komo lubatene kooloyo tukon popook, tukon Ikoo komo tantukene kooloyomatano nadungolan tukon kobituwon.

¹⁷Ikoo komo tataapene kodunia nabatas-batas, kubaiyo kotempo tolukan tukon tempo tolopot.

¹⁸Oh TEMENENO, nenekekai bulaando komusuh natotulaiyano Ikoo, kobangsa moaki natoiyo Ikoo kulokisanggene kosambu-Mu.

¹⁹Inai mosalakanggene Komumian moakimo natoiyo konakinubai doi musuh molokis kolimano. Inai motoliminggene sidutu Komu mian nanasib mosoe.

²⁰Nenekekai Komuperjanjian Ikoo mokubaiyo tukon kami, sabab komian lakukene konatindakan molobi-lobian doi sasamba kolipu mokalipokan doi tanonia.

²¹Inai mobatadikene komian molinailainggon nainakamaa, boliisi komian mosakisaa tukon motalalais nanggaale Ikoo.

²²Kokondongokai oh Mian Bisa, belayokai Komuperkara! Sabab sasamba kooloyo Ikoo tongo tinotulai luwedoi mian-mian moaki namangangga doi-Koo.

²³Inai motoliminggene Komumusuh-musuh nawowokonan, konapelekan Komumusuh-musuh pololokon babasal koalaloila!