Read Banggai SADEONG 78 Bible Online

SADEONG 78 - Banggai bible

SADEONG 78

¹Asaf nanyanyian otunggul. Eh dakubangsa, ndongoliyokai dakuotunggul, perhatikanggene dakubantilan-bantilan.

² Yaku yase mabantil pepata tukon andean, tukon tarangkanggene kososombot doiloonu loolukon,

³langge-langge kami molengele tukon kami motalimayo, mosinalitakon luwedoi napo mbumbu tulunan.

⁴Kami aki mai yase molasiakanggene domai pau-pau; kami yase babontilanggene doi mian motubo doibundu tentang ko TEMENENO nakuasa tukon Kona limang-limang babasal, tukon Nakokubai-kokubai mominasaindinggon.

⁵Doi bangsa Israel Yana beekene Konaukum tukon doi Yakub nakatulunan Yana beekene Konaparentah. Yana sumboliyo kondakatulunan Naotunggukene doi napo pau-pau,

⁶sulano komian motubo doibundu natoyo, maka napootunggukene koidan doi napo pau-pau.

⁷Tukon kalu bunodoiya yanila koidan naikon mangabos moinian doi Mian Bisa, tukon aki toliminggene Kona kokubai, bai sidutu taat doi Naparentah,

⁸sulano naaki napokakana konapo tulunan moiyase mbuwol tukon durhaka; generasi penerus mounggot kona iman, tukon aki nasetia doi Mian Bisa.

⁹Efraim nabenseno momapake sinapan panah tukon katapel, yanila bulenggene kobutongo doi tempo polobosian.

¹⁰Yanila lupaiyo ko Mian Bisa napaladandian tukon yanila, tukon aki naiyase taat doi Nahukum.

¹¹Yanila toliminggene naikon Kona kokubai-kokubai, tukon langge-langge minasaindinggon Yana mookitakene doi yanila.

¹² Doi napombumbu napotulunan salaano, ko Mian Bisa, mokubai langge-langge minasaindinggon doi tano Mesir, doi Zoan seanono.

¹³ Yana batayo kotobun, maka Napintasene yanila; kopaisu Yana atadeo pokakana kobondungan.

¹⁴ Yana andane yanila tukon bunom doi tempo oloyo tukon bilat laango madialan popupuson kopopook.

¹⁵ Yana batayo kobunggul batu doi padang lalomo, tukon beene yanila monginum paisu lobi-lobian.

¹⁶Bunggul batu Yana sumboliyo namotobuaton paisu, maka lombamokai kopaisu pokakana kopaisu batango.

¹⁷Bai yanila banggadudul momokubai lalim doi Mian Bisa, doi gurun yanila nggimal tuuk doi Mo Tatandak Tuuno.

¹⁸ Yanila sangaja mosobaiyo ko Mian Bisa, tukon yanila tuntute kokinaan yanila moiyase.

¹⁹Yanila tumbokiiyo ko Mian Bisa tukon bantile, “Molakai ko Mian Bisa mobeena kita kinaan doi padang gurun?

²⁰Takainomo Yana umbase kobunggul batu momotikas, sampe kopaisu lomba tukon makasang. Bai moolakai Yana, koidan mosadiayo koroti tukon beene sail doi Namian?”

²¹Sambuno lengele doiya, ko Mian Bisa nggimal tukon lubotiiyo lobosiyo Kona mian tukon bilat; Kona nggimalan motuuk doi yanila pololokon teali,

²²sabab yanila aki namaangga doi Mian bisa, doi Nakuasa komo moala salamatene yanila.

²³Maukai nabunodoiya Yana palentayo kotimbu sulano nabukaiyo konatataapon-tataapon.

²⁴ Yana bulusene kogandum moluwe doi surgaa, manna tuuk napo kinaan.

²⁵Yana beena yanila kinaan molobi-lobian; yanila makaan malaekat naroti.

²⁶Yana koidan sumboliyo komombuul tolopot napuul, luwe Nakuasa komombuul lalom puul.

²⁷Yana bulusene kotomisi-tomisi doi Namian, kona kadaang pokakana kobone moaki natangait.

²⁸Yana tuwenge dotomisi-tomisidoo doi basandungan, doi potikunggon kolipu napo dungolan.

²⁹Maka yanila makaanokai polong bobosul, sabab ko Mian Bisa lapamo beena doi yanila oilamo konapo iniyas.

³⁰Bai konapo moot akiyono koidan nakambul jadi yanila banggadudul kaan momeenggon.

³¹Ko Mian Bisa nggimaal tukon tumbokiyo yanila, Yana akateo ko Israel mian-mianno motabokon tukon tambongan barani.

³²Maukai nabunodoiya Konamian tataap baladosa, Konalangge-langge kinubai mominasaindinggon aki nakubaiyo yanila teali mangangga.

³³Maka ko Mian Bisa opupuse konapo tuboan pokakana koansaang, konapo taun-taun kabus doi matakutan lalomo.

³⁴Sasamba lunggon ko Mian Bisa namangakate moi-moiya doi antara yanila, kobailonggon manasal tukon abali doiya-Na.

³⁵Yanila neneke baikon ko Mian Bisa napo soopan, tukon baikon Mo Tatandak Tuuno pasalamat.

³⁶Bai yanila kakalaiyo Yana, konapo bantilan-bantilan kala tuuno.

³⁷ Yanila aki nasetia doi Yana, tukon aki nabatani doi Napaladandian.

³⁸Bai ko Mian Bisa mamaasikene tukon ompuniyo Konamian, tukon aki nalapusene yanila. Badaang lunggon Natane Konanggimalan, tukon aki naosumbute Konaliitan.

³⁹Yanila neneeke baikon yanila tongo makluk mofanaa, pokakana kombombuul moalon tukon aki naabali koidan.

⁴⁰Bubula luunggon napo nggimal doi Yana, tukon sakitiyo Konoano doi tempo napo danoan doi padang gurun.

⁴¹Badaang lunggon napo sobaiyo ko Mian Bisa, kubaiyo susah Komo Moliyous, Israel na Mian Bisa.

⁴²Yanila aki naneneeke naikon konakakuasaan, naikon kooloyono yana moolupute yanila luwedoi musuh,

⁴³doi tempo namokubaian langge-langge mominasaindinggon doi Mesir, tukon mujizat-mujizat doi padang Zoan.

⁴⁴ Konapo paisubatango-paisubatango binolii teali sau, sampe aki napo moola inume kopaisuno.

⁴⁵ Yana sakisayo yanila tukon poos mobadaang, tukon batadikene konapo buta tupak namanase.

⁴⁶ Yana lubatene kobesuk tukon betek, moakabuse kolangge saono tukon kokombung hasilo.

⁴⁷ Yana rusayo konapo anggur batango tukon udan batu, tukon konapo ara batango-batango tukon linggous mokundot.

⁴⁸Yana batadikene koudan es sulano natepake konapo iyayon piniala, tukon koselese tepake konapo iyayon-iyayon.

⁴⁹Yana sumbutene Konanggimalan mokolot-kolot tukon mosumbolii bito-bito meeng kopasukan malaekat matean mokubaiyo yanila bontol konamoinian.

⁵⁰Yana aki nataane Konanggimalan kai seseange konapo tuboan, bai yana silakaiyo kabus yanila tukon sesel mobadonggiti tukon minatekon.

⁵¹ Yana akateo kopau mala-malaneno langgongo doi sasamba korumah tangga doi Mesir.

⁵² Maka Yana totoliyo Konamian pokakana kodomba tambuno badaang, tukon andane yanila loloiyo kopadang lalomo.

⁵³ Doi Naandanano lalomo yanila aman tukon aki namatakut, sabeakai konapo musuh molomos doi tobun lalomo.

⁵⁴ Maka Konamian Yana babyo doi Nabuta moliyous, doi lipu bunggulo Yana molambase susuungo.

⁵⁵ Doi Namian salaano Yana sikayo komian modungol idoo maka Yana ebe-ebese dotanodoo doi sasaibino kobangsa Israel benseno, doiyamo Namian, sampe yanila moola dungoliyo komusuh nasandung-sandung.

⁵⁶ Bai yanila nggimal tukon ujiyo ko Mian Bisa Moinakatandak Tuuno, Kona parentah-parentah aki napo taatiyo.

⁵⁷Yanila aki naloingiyo pokakana konapo mbumbu, tukon aki namoola inangga pokakana kobusur mopatek.

⁵⁸Yanila tumbokiiyo ko Mian Bisa tukon lipu mososubaiyan pilogot, tukon kubaiyo Yana masakit konoano tukon napo timbalang-timbalang.

⁵⁹Sambuno kitayo doiya, ko Mian Bisa nggimal tuuno, tukon tolayo banggadudul yanila.

⁶⁰ Yana tinggale Konasandung doi Silo, lipu Nadungolan doi antara banggapi.

⁶¹ Yana batadikene Kona Peti Paladandian natinaan, paloosan Kona babasalan namusuh lambase.

⁶²Yana nggimal doi Namian, koona Napusaka, tukon batadikene napo inakate tukon sabel.

⁶³Konapo tabo-tabo kinaan bilat, akiyo komo mokita konapo pau-pau boine.

⁶⁴Konapo imam-imam inakate tukon sabel, konapo balu-balu aki namoola kokiil.

⁶⁵Maka ko TEMENENO bangun kokondong pokakana komian mobangun doi namooloan, pokakana komian bukuan salataa lapa monginum anggur.

⁶⁶Yana umbase basulakon Konamusuh, tukon lungguiyo yanila polong sidutu-posidutukon.

⁶⁷Bai Yana tolayo Yusuf nakatulunan tukon aki nalilike Efraim nabenseno.

⁶⁸Konalinilik doiyamo Yehuda nabenseno, tukon Sion Bunggulo Yana moseange.

⁶⁹Yana bangune Kona Bonua pokakana Konadungolan doi surgaa, tukon pokakana kodunia, moonggol tuuk sidutu-posidutukon.

⁷⁰ Yana lilike Daud teali Naata, tukon ndokiiyo yana luwedoi naiyayon piniala,

⁷¹luwedoi lipu Nabapialan domba tinano, sulano natotooliyo ko Israel Namian.

⁷²Daud pialayo yanila tukon tootubo konoano, tukon napandoian yanila andane yana.