Read Banggai SADEONG 80 Bible Online

SADEONG 80 - Banggai bible

SADEONG 80

¹Tuuk mokatuaiyo konyanyian. Linoingikon kolagu: Bakung bungano. Asaf nakasaksian Sadeongo.

² Oh Kopototooli Israel, lengelekai, Ikoo komo katuaiyo Yusuf nakatulunan salaku meeng kotambuno. Ikoo komo osulang doi kulusii batomundoan luwedoi malaekaat modaano kokapilo, lubatokai tukon mulalaanganan

³doi Efraim, Benyamin tukon Manasye salaano. Tudoikanggamikai Komukuasa doi kami, tukon lubatkai Musalamatanggami.

⁴Oh Mian Bisa, abalikenekai komai tuboan pokakana doi looluk; mbalenggamikai tukon noasanaang, sulano mai salamat.

⁵Oh TEMENENO Mian Bisa Mo Babasal Konakuasa, polong doi tempo oila Komungginalan, maukai Komumian nasambeang?

⁶Ikoo tealikene kami kokiil sabab kinaan, komata leelo tokumbe sabab paisu moininum.

⁷Ikoo pataikene kobangsa-bangsa mopoloolanikon yanila posalakon tentang maibuta komai musuh-musuh kokumbit sanaangan.

⁸Oh Mian Bisa Mo Babasal Konakuasa, abalikenekai komai tuboan pokakana doi looluk; mbalenggamikai tukon noa sanaang, sulano mai salamat.

⁹Komumian pokakana koanggur batanggo Ikoo mobiyele luwedoi Mesir. Bangsa-bangsa bailon Ikoo siikayo, maka Musakakene kayungdoo doi napo tano.

¹⁰Ikoo masadiakene buta doiyana; maka yana daano koalono motanonggon ate-atean tukon tokita loas doi posaapon kotano.

¹¹Yana soopiyo kobunggul-bunggono, tukon koidan kopanga-pangano tombukiyo koaras babasal batang-batango.

¹²Kopanga-pangano tobuat bulusan polong doi Tobun Tanga, kolende lendeno polong doi Efrat Paisunobatango.

¹³Oh Mian Bisa, bulaando Ikoo molopoyo kopagalo, sampe sasamba komian moalon mopupu saono?

¹⁴Kobabung labo kakate teali manas, tukon iyayon doi padang komo kaane.

¹⁵Oh Mian Bisa Mo Babasal Konakuasa, lubatkai koikoidan, mbalengkai luwedoi surgaa tukon palaatinggenekai Komumian.

¹⁶Salamatekenekai komian mopokakana koanggur batanggo molapamo Ikoo sakakene susuumu, tukon koanggur sopiino Ikoo tealikene moonggol.

¹⁷Musuh tapeyomo tukon suwayomo; sobiiyomo yanila nainakate kabus luwedoi Munggimalan.

¹⁸Eseepekai komian Ikoo molapamo lilike, bangkapi pauno molapamo malaat bukuanan doi-Koo.

¹⁹Maka akimo koidan mai isa luwedoi Ikoo; dagaiyokai komai tuboan, sulano mbai nggaale Ikoo.

²⁰Oh TEMENENO Mian Bisa Mo Babasal Konakuasa, abalikenekai komai tuboan pokakana doi looluk, mbalengekai kami tukon noa sanaang, sulano mai salamat.