Read Banggai SADEONG 81 Bible Online

SADEONG 81 - Banggai bible

SADEONG 81

¹Tuuk mokatuaiyo konyanyian. Loingiyo kolagu: Gitit. Luwedoi Asaf.

²Manyanyikenekai kongganggaalano motuuk doi Mian Bisa, nda moinian bukuanan, powowookonkao tukon labalaba doi Yakub na Mian Bisa.

³Bantengekai kobobolon, manyanyikenekai kolagu, kutiyokai kogambus tukon kacapi sio namerdu.

⁴ Puukekai kotorompet doi nda oloyo babasal, doi lamekanano kobituwon boolu tukon bituwon babasal.

⁵Sabab dolanggedoo meeng koaturan doi Israel, meeng koparentah mo luwedoi Yakub na Mian Bisa.

⁶Yana tealikenemo meeng kokatatapan doi bangsa Israel, salataa yana maju lawane ko Mesir. Yaku lengele kosilingan moaki kutoiyo,

⁷“Yaku lapamo bingkate ko barang mo tinanggung luwedoi benggumu, tukon liate kobois natinanggung moluwedoi limamu.

⁸ Doi mususaan lalomo komuyu uwang, tukon Yaku salamatene komuyu. Yaku timbiliyo komuyu luwedoi duluk lipu Kubasookonan, Yaku ujiyo komuyu doi Meriba, paisuno matano.

⁹Lengelekai Dakupoingotii, eh Dakumian, Israel, kalukai komuyu yase molongolaku!

¹⁰ Inai doi antara komuyu daano komo sosubaiyo ko temeneno bailon, inaikai mososubauyo ko temeneno molulubaton.

¹¹Yakumokai ko TEMENENO mu Mian Bisa, moandane komuyu tobuat luwedoi Mesir. Doi tempo po malaalan Kubeenggomuyu kaan.

¹²Bai Dakumian aki naiyase ndongoliiya-Ku, Israel aki naiyase taat doiya-Ku,

¹³Tobikon doiya Yaku sobiiyomo napo katikase konoano; sobiiyomo napo loingiyo konapo mongiasan susungu.

¹⁴Ah, kalukai Dakumian yase ndongoliiya-Ku, kalukai yanila yase taat doiya-Ku,

¹⁵Maka tukon soisobit Kuakalayo kona musuh, tukon lungguiyo sasaibino konapo lawan.

¹⁶Komian momosikitana-Ku naikon Yaku lungguiyo, yanila naikon inukum tuuk sidutu-posidutukon.

¹⁷Bai Dakumian Yaku naikon beena makaan gandum momonondok tuuno, tukon Yaku tealikene bobosul tukon ani dokoto.”