Read Banggai SADEONG 84 Bible Online

SADEONG 84 - Banggai bible

SADEONG 84

¹Tuuk mokatuaiyo konyanyian. Loingiyo: Gitit nalagu. Korah pulino na Sadeong.

²Bolikon langge konasanaangan Komu lipu dungolan, oh Mian Bisa Mo Babasal tuuno Konakuasa!

³Konoanggu peleenggene tuuno Komu Bonua, kobutonggu tootubu kokuweis laba doi Mian Bisa motubo.

⁴Sabeakoi kotomisi toopinis namaalat bonua tukon kotomisi layang-layang nadaano konatelea, lipu napo abosano konapau doi loolanian Komubalabaan, oh TEMENENO Mo Babasal Tuuno Konakuasa, daku Tomundo tukon ku Mian Bisa.

⁵Tutuu konasanaangan komian modungol doi Mu Bonua, tukon manyanyikene konggaalano doi-Koo sidutu.

⁶Kinatauwankai komian momaalat bukuanan moluwedoi Ikoo, tukon komoiyase mokubai ziarah doi Sion Bunggulo.

⁷Yanila daanoan moambakon mololoiyo ko Baka Pepelako, doilipudoo yanila boliiyo teali paisu matano, koudan tumbeno teali balaakat molobi lobian.

⁸Konapo bukuanan pololokan sosunggi, doi tempo napo ambakonan doi Sion, doi Mian Bisa nalipu sasaibino kotomisi nakitakanano kobutonggo.

⁹Lengelekai daku sambeang, oh TEMENENO Mian Bisa Mo Babasal Konakuasa, lengelekai, oh Yakub na Mian Bisa.

¹⁰Oh Mian Bisa, balakaatiyokai komai tomundo, eseepekai komian molapamo Ikoo lilike.

¹¹Lobian konamomondokon kalu kita dungul meeng kooloyo doi Mu Bonua tukon kalu kita dungol sololoon kooloyo doilipu bailon. Yaku iyasemo tukon lilike momoteali padagai tataapon doi ku Mian Bisa Na Bonua kalu baino yaku modunggol doi mian molokis nabonua.

¹²Sabab ko TEMENENO Mian Bisa pongosoop kita tukon tomundo mobabasal, mobeena kita seang tukon pongodotii. Yana aki nabiasa motolayo oilamokai komo monondok motuuk doi mian konatuboan moakiyo konasalah.

¹³Oh TEMENENO Mo Babasal Konakuasa, kinatauwankai komian momaangga doi-Koo.