Read Banggai SADEONG 86 Bible Online

SADEONG 86 - Banggai bible

SADEONG 86

¹Daud nasambeang. Oh TEMENENO, lengelekai dakusambeang, tukon timbiliyakukai, sabab yaku nia talalais tukon muyuko kobutonggo.

²Sabab Ikoo seseangaku, tobikon doiya dagaiyokai dakutuboan, tukon salamatenekai Komuata momaangga doi-Koo.

³Ikoomokai daku Mian Bisa, seseangaku oh TEMENENO, sabab popupuson kooloyo daku sambeangan doi-Koo.

⁴TEMENENO, labakenekai Komuata noano, sabab tongo doi-Koo dakuotukano konoanggu.

⁵Oh TEMENENO, Ikoo monondok, tukon yase moompuniyo komian nasala, komian mosambeang doi-Koo tataap Ikoo seseange tukon seang molobi-lobian.

⁶Oh TEMENENO perhatikanggenekai dakusambeang, lengelekai dakuponguang makabi tulungan.

⁷Doi tempo kukasulitanan yaku sambeang doi-Koo, sabab Ikoo timbiliyaku.

⁸Oh TEMENENO, akiyo ko temeneno pokakana Ikoo, akiyo komo moola lakukene oila Komulinakukon.

⁹ Oh TEMENENO, sasaibino kobangsa Ikoo tealikene naikon lubat, sulano nasosubaiyo Ikoo tukon nanggaale Komubabasalan.

¹⁰Sabab Ikoo tambongan barani tukon lakukene kolangge-langge minasaindinggon, tongo Ikookai ko Mian Bisa.

¹¹Oh TEMENENO, otunggukanakukai komumongiasan doiyaku, sulano kuloingiyo tukon tutuu; tealikanakukai mian matakutene ko TEMENENO tukon tootubo konoanggu.

¹²Yaku basyukul doikoo tukon tootubo konoanggu, oh TEMENENO ku Mian Bisa; yaku nggaale Komubabasalan sidutu-posidutukon.

¹³Sabab Ikoo tataap seseangaku tukon seang mobabasal; Ikoo lapamo sodiiyo dakutuboan luwedoi kubur leengo.

¹⁴Oh Mian Bisa, komian babanggal abali lubat tukon lobosiyaku, meeng kotambuno komian molokis yase moakateyaku; yanila aki napopusinggon Ikoo.

¹⁵Bai Ikoo, oh TEMENENO, Mian Bisa mobabasal kona neaasi tukon peseseang, sabar, moono seang tukon nasetiaan.

¹⁶Perhatikanggenekai tukon mamaasikanakukai, kobukuanggenekai tukon salamatanakukai, sabab pokakana kotinanggu, yakukai lakukanggene Komuaturan tukon tutuu.

¹⁷Beekanakukai kopaloosan Mumonondokan, oh TEMENENO, sulano komian momosikitanaku teali mamaa, kalu yanila kitayo Ikoo motulungiyaku tukon hiburaku.