Read Banggai SADEONG 88 Bible Online

SADEONG 88 - Banggai bible

SADEONG 88

¹Nyanyian. Korah pulino na Sadeong. Tuuk mokatuaiyo konyanyian. Mololoi lagu: Mahalat Leanot. Heman, Ezrahi miano nanyanyian otunggul.

²Oh TEMENENO, Mian Bisa mosalamatanaku, doi tempo oloyo yaku uwang doi-Koo, doi tempo popook yaku mangadap doi-Koo.

³Boliisi daku sambeang napolong doi-Koo, lengelekai daku uwangan.

⁴Badaang kosusaan motepakaku; komatean daano doi tataapon mbambano.

⁵Yaku pokakanamo komian naikon mobulus doi kibul leengo, pokakana komian mokabuso kobukuno.

⁶Yaku inodungol doi mian mate lalomo, pokakana komian moinakate, tongokoolo doi kubur lalomo, pokakana komian Ikoo motoliminggene banggadudul, mian moakimo mutulunge koidan.

⁷Ikoo lambitanaku doi bitu moatean, doi kubur leengo moatean tukon kalipookan.

⁸Komunggimalan dedekene konoanggu teali motoong yaku teali manas talailainggon luwe Munggimalan.

⁹Ikoo dedenggenemo daku sobat-sobat luwedoi yaku, tukon Ikoo kubaiyaku mosikitene yanila. Yaku takurung tukon akimo kumoola tobuat,

¹⁰komatanggu teali bobongan sabab sakisaa. Sasamba kooloyo yaku uwang doi-Koo, TEMENENO, tukon yaku sambeang kolimanggu tongulul doi salaanggu.

¹¹Oilakai Ikoo mokubai langge mominasaindinggon tuuk doi mian mate? Oilakai yana tubo luwedoi matean tukon nggaale Ikoo?

¹²Oilakai Komuseang binabontilanggon doi kubur lalomo, tukon Musetiaan doi lipu molokis?

¹³Daanokai komotoiyo komulangge minasaindinggon doi kalipookan lalomo, kai Mumonondokan doi tano tampat motinoliminggon?

¹⁴Bai yaku makabi Mutulungan, oh TEMENENO, sasamba kodowa-dowa kulibakene daku sambeang doi-Koo.

¹⁵Oh TEMENENO, bulando Ikoo motolakaku? Bulando Ikoo mopalesene koduduso-Mu doi yaku?

¹⁶Salataa doi kupopoisikan yaku sakisaa tukon matean lolongganaku, yaku payah tuuno motanggunge Komu ukuman.

¹⁷Komu nggimalan molokis akamanase yaku; Komu sakisawan mobolikon langge akamanase yaku.

¹⁸Popupuson kooloyo Komu nggimalan pokakana koeyaba boilingiyaku, molubotiiyaku doi sasaibino kodunia pasuno.

¹⁹Kotula-tulanggu mo pomondokon yaku Ikoo dedenggene doiyaku baimo kalipokan lalomo komo kotulaaku.