Read Banggai SADEONG 89 Bible Online

SADEONG 89 - Banggai bible

SADEONG 89

¹ Etan Ezrahi mianno, nanyanyian otunggul.

²TEMENENO, luwedoi mumaasi, sio kumanyanyikene sidutu, komu setiaan naikon yaku babilitakene tulun-tomulun.

³Sabab yaku toiyo komu maasi sidutu-posidutukon, komu setiaan moonggol pokakana kotimbu.

⁴Ikoo bantile, “Yaku lapamo mokubai perjanjian tukon mian Kuililik Yaku lapamo batotopi doi Daud, Kupeleleani:

⁵ ‘Komu batomundoan yaku pertahantanggene tuuk sidutu-posidutukon, turun-temurun mupau tumbu naikon komo dudukiyo.’ ”

⁶Korapat doi surgaa nggaale komu kokubai-kokubai mominasaindinggon, tukon manyanyikene Komusetiaan, TEMENENO.

⁷Doi timbu akiyo komo pokakana Ikoo, oh TEMENENO, akiyo komahluk surgaa komo buno Ikoo.

⁸Ikoo inodotii doi sasaibino komo moliyous, minatakuton labian luwedoi sasaibino komo daano doi mupotikunggonan.

⁹TEMENENO, Mian Bisa Mo Babasal Konakuasa, indekai komo pokakana kona bukuanan Ikoo? Ikoo setia doi sasaibino kolangge langge lalomo oh TEMENENO.

¹⁰Ikoo kuasaiyo kotobun mo liyookon, tukon akateyo kobokolo mo babasal.

¹¹Rahab, naga tobun, Ikoo patele tukon Ikoo akateyo, tukon limamu bukuan Ikoo lungguiyo Komu musuh-musuh.

¹²Ko timbu tukon dunia daanokai Mulangge, kodunia tukon sasaibino koantoko Ikoo komo pasitakayo.

¹³Ikookai komo tealakene kolembet tukon lalom, ko Bunggul Tabor tukon Hermon pokoku-kokuweisi doi Ikoo.

¹⁴Tutuu babasal Komukuasa, tukon tutuu hebat Komubukuanan!

¹⁵Kokaadilan tukon hukum daanokai dasar Mubatomundoan, komaasi tukon kesatiaan jelas potingonu doi sasaibino Komu tindakan.

¹⁶Kinatauwankai kobangsa mo bakaleda tukon laba, motubo doi Mudaanoan lalomo laango, TEMENENO.

¹⁷Po pupuson kooloyo yanila labalaba tukon tataap moonggol, sabab Mumonondokan.

¹⁸Ikoo beena kami manaangan mo monondok tuuno, sabab tongo Mumonondokankai kami malaat mananangan.

¹⁹Sabab komai padagai doiyamo mian Ikoo mopiliyomo, oh TEMENENO; komai tomundo daanokai Israel miano na Mian Bisa Moliyous konoano.

²⁰Doi loonu loolukon doi meeng komokitaan lalomo, Ikoo bantile doi Mupeleleyani mo molole, “Yaku lapamo tulungiyo komeeng kotalenga, meeng komian Yaku molilikemo luwedoi rayat malapamo Kukatandake.

²¹ Yaku lapamo pososuung Daud, Kupeleleyani, tukon Yaku lantike yana tukon lisison bakolobokiyan.

²²Daku bukuanan sedutu lindungiyo yana, Daku kuasa naikon tealikene yana bukuan.

²³Yana aki naikon nalinunggui musuh, tukon aki naikon mian lokis nalailainggene.

²⁴Sasaibino kona musuh naikon Yaku olupuwo, Yaku akateyo indee tolong komo mosikitene yana.

²⁵Yaku naikon tataap mamaasikene yana tukon setia doiyana, tukon Yaku kubaiyo yana pololokon berkuasa.

²⁶Kona batomundoan naikon Yaku ekebelane, luwedoi Tobun Tangano polong doi Efrat Paisunobatango.

²⁷Yana naikon bantile doiya-Ku, ‘Ikoo ko Tamanggu, ku Mian Bisa, padagai tukon kupasalamat.’

²⁸ Yaku naikon tealikene yana kumalane langgongo, mo babasal tuuno doi antara sasaibino ko tomundo.

²⁹Yana naikon tataap Yaku mamaasikene polong posidutukon, Daku perjanjian tukon yana tataap moonggol.

³⁰Kona kursi batomundoan Yaku pertahankanggene selama kotimbu daanoon doi dunia bunggono, turun-temurun pau natumbu naikon komo dudukiyo.

³¹Bai kalu kona katulunan lumbaiyo Daku hukum, tukon lailainggene Daku parenta,

³²kalu yanila aki napusinggene Daku katataapan, tukon lailainggene Daku aturan,

³³Yanila Yaku ukume tukon pongumbas sabab napo palanggaran, tukon Yaku tepokiiyo balaa sabab na dosa-dosa.

³⁴Bai Yaku tataap mamaasikene Daud, tukon aki naikon Kuakiyenggene Dakusetiaan.

³⁵Daku perjanjian tukon yana aki Kuebetele, luwedoi Kujanji akiyokai komeeng Yaku mobubute koikoidan.

³⁶Tongo idan luunggun tuuk posidutukon Daku bototopian tukon Kosambunggu mo moliyous; Yaku akikai Kubakalakala doi Daud.

³⁷Kona kursi batomundoan naikon bataanggon kalu kooloyo matano tataap daanoon, turunan paisobolii koturunan pauna tumbu naikon komo osulongiiyo.

³⁸Kona batomundoan tataap daano pokakana kobituwon, sakisii mosetia doi bunom-bonum.”

³⁹Bai budodoiya Ikoo nggimoliiyo kotomundo, Ikoo sakukene tukon tolayo komian Mulinilik.

⁴⁰Ikoo ebetele Komu perjanjian tukon Mupeleani, kona songko batomundoan Ikoo sakukene doi lapetak lalomo.

⁴¹Ikoo lubange konakota betoon-betoono, kona benteng-benteng Ikoo tealikene potimbuni.

⁴²Sasaibino komian moala lambase konalangge, yana teali salita pototulay doi napololanikonan.

⁴³Ikoo beena manaangan doi namusuh-musuh, tukon kubaiyo sasaibino konalawan labalaba.

⁴⁴Tukon koidan konasinapan Ikoo tealikene kiyo kotakoso, Ikoo aki mutulungiyo yana doi polobosian lalomo.

⁴⁵Ikoo opupuse kona kuasa mohebat, kona kursi batomundoan Ikoo sakukene doi buta.

⁴⁶Ikoo ekependeyo kona loonu tabokonan, tukon tutupiyo yana mamawan.

⁴⁷Oh TEMENENO, polong oila kotempono Komu basookonan? Polong oila kotempono Komu nggimalan modulep pokakana kobilat?

⁴⁸Neneokakukai bulando kona palusan daku tuboan nia, Ikoo positakayo kobangkapi salaku langge motubo moakiyo kotakoso.

⁴⁹Indeekai komo moola tubo banggadudul tukon aki namate? Indeekai komo moola luput luwedoi tinadinan?

⁵⁰Oh TEMENENO, inaadokai kopalooseno Komumaasi motumbe-tumbeno, Ikoo mo janjikene doi Daud luwedoi Mukosetiaan?

⁵¹Oh TEMENENO, neneekekai bulaandokai namupeleleani nia mo tinotulai, yaku tanggunge kobangsa badaang napototulai.

⁵²Oh TEMENENO, komu musuh-musuh totulaiyo kotombuno mulinilik, totulaiyo yana doiyaandomo tolong kona tausan.

⁵³Nggaalekai ko TEMENENO tuuk sidutu-posidutukon. Natealikene bunodoiya! Amin!