Read Banggai SADEONG 9 Bible Online

SADEONG 9 - Banggai bible

SADEONG 9

¹Tuuk komo katuaiyo konyanyian. Menurut Mut-Laben nalagu. Daud na Sadeong.

²Tukon totubo konoanggu yase mobasukuur doi-Koo TEMENENO, tukon babilitakene Komulimang mo kinabasal.

³Yaku yase tedes tukon laba-laba sabab Ikoo tukon yaku nggaale kosambu-Mu, TEMENENO Mo Tatandak Tuuno.

⁴Doi salaa-Mu dakumusu abali tukon bulen; yanila tuwong takait tukon mate.

⁵Sabab Ikoo maparenta salaku hakim mo adil; Ikoo lapamo belayo daku perkara.

⁶Ikoo ukumemo kobangsa-bangsa tukon akateomo komian-mian molokis; yanila tinoliminggono polong sidutu-posidutukon.

⁷Komai musuh kabuso molopu konapo kota-kota ikoo manasemo; akiyono komo neneke koidan.

⁸TEMENENO maparenta polong sidutu-posidutukon; yana kekendenge konabatomundoan sulano nahakimnyo kodunia.

⁹Yana parentayo kobangsa-bangsa tukon adil tukon akimiyo yanila tukon jujur.

¹⁰TEMENENO doo tampat soopan doi mian mopiniipik, tampat soopan doi tempo susaan.

¹¹Mian motingoniyo Ikoo moinikene doi-Koo, oh TEMENENO, komian mo susubaiyo Ikoo aki Mutinggale.

¹²Nggaalekai ko TEMENENO momaparenta doi Sion! Basalitakenekai Konakokubai doi bangsa-bangsa!

¹³Sabab Yana neneeke doi mian mosakisaa tukon akinatoliminggene konapo kilisonan; mian molakukene kokakalasan Yana ukume.

¹⁴Kitayokai komusuh sakisayo yaku; mamasikanakukai, oh TEMENENO osobiyokai yaku luwedoi matean,

¹⁵sulano yaku nggaale Ikoo doi Yerusalem tumbuno salaano. Yaku naikon wookon laba-laba sabab Ikoo salamatene yaku.

¹⁶Bangsa-bangsa moaki Natingonikon tuwong doi bitu lalomo yanila mokaliyo susungo; yanila tositak doi napotalong lalomo susungo.

¹⁷TEMENENO lapamo okitakene Kobutongo sabab Konakaputusan moadil. Mian molokis tongusokon luwedoi nakokubai susungo.

¹⁸Komatean daanokai konapupusan komian-mian lokis, bangsa-bangsa moaki napusinggene ko Mian Bisa.

¹⁹Aki natuuk posidutukon komian motallais natinoliminggon; aki natuuk momeenggon komian mosakisaa akiyo kona moinian.

²⁰Kokondongokai, Temeneno, hakimiyomokai kobangsa-bangsa, inai mosodiiyo kobangkapi nababanggakene kobutongo.

²¹Batadikenemokai yanila napomatakut, oh TEMENENO, tukon napotoiyo baikon yanila tolongo bangkapi.