Read Banggai SADEONG 94 Bible Online

SADEONG 94 - Banggai bible

SADEONG 94

¹Oh Mian Bisa, Ikoomokai ko Mian Bisa momoola mobalase, oh TEMENENO, tudoikenemokai Komupabalas.

²Oh hakim posaapon kodunia, kokondongokai, ukumemokai komian mobabanggaal posukotii konapo kokubai.

³Oh TEMENENO, polong oila kotempono komian molokis nalabalabaan? Polong oila kotempono, oh TEMENENO?

⁴Yanila masakukon bantilan-bantilan molokis, tukon konapo kulokisan yanila babanggaakene.

⁵Oh TEMENENO, yanila lailanggenemokai Komu mian, tukon tutukiyomo Komu mian pilih.

⁶Kobalu-balu tukon pau tuboon yanila akateyo tukon mian molulubaton modungul nai tano nia.

⁷Konapo bantilano, “Ko TEMENENO aki nakitayo, Yakub na Mian Bisa aki naparhatikanggene.”

⁸Eh daku bangsa, inakai pobonggu buno doi yaniladoo, kakatekai mopakeyo komu akal!

⁹Mian Bisa komo kubaiyo kotolingainggita, oilakai dotolingganggitadoo aki namoola molongol? Yana komo kubaiyo komatanggita, oilakai domatanggitadoo aki namoola kitayo?

¹⁰Yana komo otunggule ko bangsa-bangsa, oilakai Yana aki namoola hukume? Sasaibino komian Yana koguluno, kalu bunodoiya oilakai Yana aki napandoiy?

¹¹ Ko TEMENENO toiyo kobanggapi napikiran, Yana toiyo sasaibino akiyo kotakoso.

¹²Oh TEMENENO, kinatauwankai Ikoo mootunggulemo komian, Komu hukum-hukum Ikoo otunggulikenemo komian.

¹³Doi oloyo-oloyo na susaan ikoo beena tanaangan doi yana, kobitu mokinali tuuk malahoan mian molokis.

¹⁴Sabab ko TEMENENO aki naotinggale Konamian; Yana aki naikon nabatadikene Kona pusaka.

¹⁵Maka kohukum naikon inokoonggol koidan doi pengadilan, sasaibino komian mojujur yanila dukunge.

¹⁶Dio mian molokis salaano inde komo belaaku? Indee komo pomeenggon tukon yaku molawane komian momokubai lokis?

¹⁷Kalu andeno ko TEMENENO aki natulungiyaku, pasti yaku biol doi mian mate nadunia.

¹⁸Doi tempo kubapikiran baikon yaku naikon tuwongo, TEMENENO, Komu maasi kubaiyaku kokondong monggol.

¹⁹Kalukai konoanggu susa tukon matakut, Ikoo hiburaku tealikanaku laba.

²⁰Ikoo aki mupomeenggon tukon hakim-hakim molokis, mopikikene kokulokisan luwedoi hukum.

²¹Yanila pomeenggon molawane komian momoloyos konoano, tukon hukume mate komian moakiyo kona sala.

²²Bai ko TEMENENO doiyamo daku pembela, daku Mian Bisa teali kusoopan.

²³Yana hukume komian molokis pokokonoy kona kulokisan, tukon tealikene yanila akiyono koalalo sabab nadosa. Ko TEMENENO nda Mian Bisa naikon kukupe kobabanoila.