Read Banggai ANDEAN 1 Bible Online

ANDEAN 1 - Banggai bible

ANDEAN 1

¹ Naiamo kootinau-otinau moluwe doi Salomo Daud namalane, tomundo Israel.

²Konamakisuud doiyamo tuuk tulungiano komian motoiyo bulaando natealian kopandoian, tukon toiyo kotuboan natangatulan tukon mangalatikene kobantilan modaano koalatino tuuno.

³Naotinau-otinau nia otunggulikene bulaando komian namalaatan tuboan mopandoi, totobos, adil tukon kana.

⁴Komian moakiyo konapangalaman inotunggukon sampe daano konapikiran momamangan, mian taboon inotunggul teali mian mopandoi tukon moola bapikil motolos.

⁵Maka otinau-otinau nia komian mopandoikai naikon tosuungi konamotoiyan, tukon mian molapamo dinidik naikon malaat pongotunggul sidutu.

⁶Kalu bunomodoiya yanila moolamo mangalatikene koalatino motosookon doi otinaudoo lalomo tukon mangalatikene mian mopandoidoo nabantilan-bantilan tukon silingan-silingan yanila mo bantile.

⁷ Tuuk momalaat pandoian mobisa, tumbe-tumbeno siokai mian motoyo odotiio tukon matakutene ko TEMENENO. Mian longas aki naakuiyo kopandoian tukon aki naiyase moinotunggul.

⁸Palatikanggenekai oila tamamu tinamu nabinontiikon doi komuyu, kupau,

⁹sabab yanila naotunggul-otunggul sungiyo kopopikiran monondok buno pobubungai oluno tukon inoo mokindedeke kodudusomu.

¹⁰Kalu mian baladosa budukiyo ikoo, kupau, inaikai motulutiyo yanila nabudukan.

¹¹Kalu kai yanila bantile, “Ayo, maimo nda mounggolii mian tukon ndapeeke yana. Tuuk basa-basalita, maimo nda molobosi mian moakiyo konasalah.

¹²Diabudodoo yanila tubo sanaang tukon makalikodong; bai totiili yanila naikon teali buno mian mokakaate.

¹³Kita alayo yanila nabarang-barang modaano koanggano, sulano konda bonua moono tukon barang moirambas.

¹⁴Maimo malaing! Komu lobo ndinikuk hasilo kita ebese pokana!”

¹⁵Inaikai momalaing tukon mian-mian mobunodoiya, kupau! Dedenggenekai yanila.

¹⁶Yanila aki namoola dungol kalu akiyon namokubai lokis. Yanila yase namoso-mosobit mangakate.

¹⁷Sabeakai tomisi aki naikon nausok doi talong mobinanaton doi matano salaano,

¹⁸bai mian-mian molokis doo pololokon tanggene konatalong tuuk butongo susuungo — talong naikon mosilakaiyo yanila.

¹⁹Bisa komian momounggolii nafakaa tukon tumba-tumbakan naikon konapebeal butongo susuungo

²⁰ Ndongoliyokai! kopandoian monguang doi loloon-loloon tukon wokon doi tanalapang-tanalapang!

²¹Yana nggeleamon doi tataapon-tataapon babasal tukon doi tampat-tampat morame:

²²“He mian-mian molongas! Sampe oilamo kotempono kopoyasano tataap buno doiya? Oila kotempono nalubat komuyu tade mopiadayo komontoiyan tukon tolake kopongotunggul?

²³Ndongoliyokai yaku kalu kai yaku teguule ikoo, maka doikoo naikon kuokitakene konoanggu antoko tukon kuotunggulikene daku montoiyan.

²⁴Komuyu lapamo kuuwange, bai komuyu tolayo tukon aki poyase hilaukanggene.

²⁵Sasaibino daku otinau komuyu toliminggenemo tukon daku panganukon komuyu tolayo.

²⁶Tobikon doiya, kalu komuyu silaka, yaku naikon kokumbite komuyu.

²⁷Oh, yaku naikon sosiboliyo komuyu kalukai komuyu matakut tukon sakisaa sabab linupa kasusahan molubat buno sokoi.

²⁸Doi tempo doiya komuyu naikon wange yaku, bai aki kutimbiliyo. Komuyu naikon unggoliyo yaku doi yayaa bai aki poposunggene yaku.

²⁹Komuyu buno mian moaki nabiasa malaat motoiyan, tukon aki naiyase motaat doi TEMENENO.

³⁰Komuyu aki nabiasa yase matalima daku otinau-otinau kai palaatikanggene daku panganukon-panganukon.

³¹Tobikon doiya komuyu naikon rasakanggene kobaliko luwe doi mukakabai-kakabai tukon mutetel-tetel molokis.

³²Komian moakiyo konapangalaman naikon mate sabab aki natoiyaku tukon mian molongas naikon manas sabab aki nahiraukangganaku.

³³Bai mian mondongoliyo yaku naikon topiala. Yana tubo aman tukon aki namatakut.”