Read Banggai ANDEAN 10 Bible Online

ANDEAN 10 - Banggai bible

ANDEAN 10

¹Naiyamo Salomo naotunggul-otunggul: Pau mopandoi kotamano teali laba; pau molongas kubaiyo susah kotinano noano.

²Kokasaan moilaat tukon pakisaa aki namalaat untung; kobaliko totobosan naikon komo salamatene.

³TEMENENO aki nasodiikene komian monondok namalaal: bai Yana hala-halangiyo komian lokis sulano mian doo aki nalaate kona minomooton.

⁴Komian mosasalaon teali talalais; komian momolole naikon teali kaasa.

⁵Komian mopandoi potongikene kona bapupuiyan doi tempono, bai komian momoolo tolongo doi tempo bapupuiyan, lubatene komaa doi butongo.

⁶Mian monondok naikon malaat balakaat. Konakulokisan tosookon doi tonggulung mian lokis nabantilan-bantilan.

⁷Nonokano naikon mian monondok bunokai balakaat, bai komian lokis mosobit potoliminggene.

⁸Mian mopandoi, yase matalima otinau; mian nabasilingan molongas naikon sasaat.

⁹Komian mototobos konatuboan aman, mian mobatipu naikon totoikai.

¹⁰Inde komoseekene komotalakana, lubatene kosusaan; inde komobakilitiik tukon talang-talangan usokonggene konamonondokan.

¹¹Mian mobatutul nabantilan monondok tubo sanang, bai doi sembeleng mian nabantilan-bantilan molokis tosookon konoano molokis.

¹²Pomosikitonan lubatene kopodanganian; koposeangan ompunio saibino kokasalahan.

¹³Komian napikiran mamangan mobantile kobantilan-bantilan momamangan; mian molongas sinaki.

¹⁴Mian mopandoi konapikiran potoongikene konamotoiyan; kalu komian longas basilingan, yana unggoliyo kosilakaan.

¹⁵Kokasaan eseepe komokaasa, kotalalaisan manasemokai komian momasikin.

¹⁶Kalukai mokubai monondok, kotambono doiyamo tuboan monondok; kalu makabai lalim, kobaliko lobian badaang kolalim.

¹⁷Inde komoyase tineguul (moiliyokon) naikon tubo monondok; inde komoaki naiyase mangaku komasalah daanon doi susaan lalomo.

¹⁸Komian moseekene komisikitan daanon mobatipu. Komian mosabukene kosilingan mokala daanon molongas.

¹⁹Pololokon badaang kosilingan, pololokon badaang kolalim mominolakon; mian molaate atasio koalepo daanon pikiran momamangan.

²⁰Bantilan mian momonondok bunokai salaka tuleng; komian molokis napikiran akiyo koalatino.

²¹Bantilan mian monondok bunokai balakaat tuuk doi mian badaang; nalongasan komian longas akateo kobutongo susungo.

²²Sabab TEMENENO nabalakaat tolong komian teali kaasa; balimangan tuuno aki nalaate sungiyo konabuat.

²³Komian longas sanaang mokubai sala; komian momamangan konapikiran yase mounggali pandoian.

²⁴Komian momolooyos malaat oila kona minooton; komian lokis malaat oila komo minatakuton tuuno.

²⁵Kalu sokoi lupayo, komian lokis akiyono; bai komian mojujul tataap monggol posidutukon.

²⁶Inaikai mosumboliyo komian malas, yana tolongo misikitene tolong, buno cuka momangilu kongolingokai tibolung kukuse komatano.

²⁷Odotiyo ko TEMENENO, maka ikoo naikon tubo malumbit; mian lokis mate akiyon nalaate kotempono.

²⁸Komian monondok naminoinikon tealikene yana sanaang; komian lokis naminoinikon akiyo kai.

²⁹Komian mojujul TEMENENO lindungiyo bai kulokisene komian mo mokubai lokis.

³⁰Komian mo monondok naikon tubo aman bagia; komian lokis aki nadungol doi buta budel.

³¹Komian monondok tutule konabantilan-bantilan momamangan; komian lokis naikon aki nabiok kosuungo.

³²Komian monondok nabantilan-bantilan sanaanggene konoano; mian lokis nabantil-bantilan sidutu osokitiyo.