Read Banggai ANDEAN 11 Bible Online

ANDEAN 11 - Banggai bible

ANDEAN 11

¹TEMENENO misikitene komian mo pakeyo konabatimbangan moaki namondok bai Yana sanaang tukon mian mopakeyo kotimbangan motapaat.

²Komian mobabanggaal naikon tinotulai; mian mopependeo konoano konapikiran mamangan.

³Komian monondok kona totobosan komotuntune; mian moyase bakala-kala nabakakalaan komo manase yana.

⁴Kalau kai sasalane komatean, kobuat akiyo koalatino; mutuboan naikon salamat kalu ikoo monondok konoamu.

⁵Komian monondok nakajujulan alatayo kona loloon tubuan, bai komian lokis babayo kobutongo doi namanasan.

⁶Komian mojujul salamat sabab namonondokan konoano; mian moaki nainangga topolos doi namodokoan.

⁷Kalu komian lokis mate, kona minoinikon mate; moinikene kona bukuanan susuungo akiyo koalatino.

⁸Mian moliyous luput luwedoi kasusahan; mian lokis malaat alangan.

⁹Posalitaian komian lokis silakaiyo; mian monondok napandoiyan salamatene.

¹⁰Kota molame kalu komian jujul malaat lesekii; korayat kokuweis kalu komian lokis mate.

¹¹Mian mototobos nalubatan kindeke kokota, kobantilan mian lokis yana lusake.

¹²Totulaiyo komian bailon daanon kokubai molongas; mian monondok konoano akinaikon bantile kolobo tolong.

¹³Mosabukene kobilita mombul aki namoola taniyo kolaasia; bai mian momoola inangga moola nalaasiakanggene kopalakala.

¹⁴Bangsa naikon manas kalu akiyo komo katuaiyo; pololokon badaang kootinau pololokon bineekon kokasalamatan.

¹⁵Paladandi mobeale komian bailon nasamea koalatino lubatene kosilakaan; tadukai aki natollo doi langge doo lalomo sulano naaman.

¹⁶Boine monondok konoano malaat pongodotii; mian motolonggimolon pototongikene kokasaan.

¹⁷Komian monondok konoano labakene kobutongo; mian motolonggimolon lugikene kobutongo.

¹⁸Mian lokis nalabaan daanon labaan moaki nabisa; mian nalabaan nakokubai monondok daanon nalabaan tuuno.

¹⁹Indee komotekun nakokubai monondok, naikon tubo monondok; indee komo kokotikas tuuk mokubai lokis matean kona tinujui.

²⁰TEMENENO misikitene komian mo lokis konoano, bai yana mamasikene komian mo tubo akiyo kososibolino.

²¹Komian lokis tantu malaat ukuman, komian momonondok naikon salamat.

²²Koboine namonondokan moakiyo kona akal buno sousolut mosoni doi babungo suungo.

²³Mian monondok naminomooton sidutu kohasilo monondok, bai komian lokis naminoinikon tolongokai nggimalan.

²⁴Daano komian moiyase mebee, bai tosuungi kaasa, daano komoyase bahemat, bai pololokon tosungi talalais.

²⁵Komian momebee badaang naikon pololokon badaang, komian moiyase motombonii naikon tinombonii koidan.

²⁶Indee komo mangatambun naikon komian batotopikene, bai komian mobalukene malaat panggaal.

²⁷Indee komolole mokubai monondok naikon mian sanaanggene; indee komo mounggoli kulokisan, naikon linubotii kasusaan.

²⁸Indee komo balanggene kobuat naikon otuwong buno loon motuul; mian momoliyous naikon tubo buno susuno mongula.

²⁹Komian moloilokise konabonua lalomo, naikon lapus sasaibino. Komian longas naikon leleaniyo komian momamangan konapikiran.

³⁰Komian momoliyous naikon tokindok kona tuboan; mian momamangan konapikiran tosuungi kona pololaing.

³¹Kalu kai naidunia nia mian monondok kai naikon matalima posoboli, tantumo mian lokis tukon mobaladosa naikon malaat ukuman.