Read Banggai ANDEAN 12 Bible Online

ANDEAN 12 - Banggai bible

ANDEAN 12

¹Komian mokilakene ko montoiyan sanaang malaat panganukon; bai mian moaki naiyase inanukon daanon mian molongas.

²Mian monondok TEMENENO seseange bai komian mobatetelkene kokulokisan naikon matalima ukuman.

³Akiyo komeeng komian kai momoola tataap monondok luwedoi kulokisan; bai mian mojujul tataap monggol aki naunggot.

⁴Boloki momonondok daanon binanggakon tukon nalangkai nabahagiaan; boloki mokubaiyo kona langkai mamaa daanon bunokai panakit buku komotepakiyo.

⁵Komian mojujul pikikene kolangge-langge monondok; mian lokis batetelkene kobatipuan.

⁶Bantilan-bantilan mian lokis akateo kobantilan-bantilan mian jujul salamatene.

⁷Komian lokis naikon otuwong tukon silaka akiyo konatanda; bai mian monondok naikon tataap monggol tulun temurun.

⁸Komian mongginaal pokonoi tukon namamanganan konapikiran: mian motinotulai pokonoi tukon nalongasan.

⁹Tadukai teali rayat popoisik modaano konalimang; luwedoi nabalasipatan mian babasal banggokai kakulangan kinaan.

¹⁰Komian monondok palatikanggene kona iyayon piniala; bai mian lokis sakisaayo.

¹¹Patani mobalimang kokobukuan daano badaang kokinaan; bai mian moakabuse kotempo tuuk langge moakiyo kotakoso doiyamo mian longas.

¹²Komian lokis yase malaat untung luwedoi mian palalentel, mian monondok bunokai batango mosao.

¹³Komian lokis kona talong luwedoi bantilan-bantilan lokis kona silingan, mian monondok luput luwedoi kasukalan.

¹⁴Samba komian momalaat panganuukon pokokonoi doi bantilan-bantilan tukon nakokubai, suwe-suwele binee tambo mopokakana.

¹⁵Komian longas omiiyo kobutongo aki nasalah, bai komian momamangan kona pikiran yase mondongolii otinau.

¹⁶Kalu mian longas tosinggung, tempodoo koidan yana bantikene konoano sakito; bai mian momamangan kona pikiran aki napaduliyo kalu sinosibolii.

¹⁷Tukon nabantilano komo bisa, mian kenggele kokaadilan; tukon bakokolii, mian lubatene kona akian naadil.

¹⁸Basalitaan mosambalangan laatemo pokoloniyo konoa buno sabel motebeke; bantilan-bantilan mo mamangan bunokai pakuli moaline.

¹⁹Bakakalaan naikon tabonggalo doi sopiyongan mata; bai bantilan-bantilan mokana naikon tataap posidutukon.

²⁰Komian mo batetelkene kokulokisan yase naikon konaakiyan naadil; mian mo balausaha namonondokan naikon sanaang.

²¹Komian monondok aki naikon nakanakon silakaan; mian lokis naikon sidutu kanakon susah.

²²TEMENENO misikitene komo bakala-kala; bai yana sanaang tukon mian mojujul.

²³Komian momamangan kona pikiran aki naokitakene konamontoiyan; mian longas basalitakene konalongasan.

²⁴Bukuan balimang kubaiyo komian balakuasa; konamalasan pakisayo komian teali ata.

²⁵Lasayokai momatakut lotoyo kosamangat; bai bantilan-bantilan momonondok kabasale konoano.

²⁶Komian momonondok laba tuuno luwedoi napokolanian; komian lokis tapa sabab nakulokisan.

²⁷Tukon namalasan aki nalaate kona pinikikon; tukon balimangan tuuno komian malaat kasaan.

²⁸Komian mololoi loloon mo kana naikon tubo monondok; mian momololoi loloon molokis sasalane komatean.