Read Banggai ANDEAN 14 Bible Online

ANDEAN 14 - Banggai bible

ANDEAN 14

¹Kobonua lolongguno boine momamangan konapikiran komo bangune, bai kona longasan komo lubange.

²Komian mojujul matakut tukon odotio ko TEMENENO Mian Bisa; komian natuboan moaki namoloyos totulaiyo Yana.

³Sabab napongaan, mian longas yase kabasale kobutongo; komian momamangan konapikiran naikon sininggouli sabab doi nabantilan-bantilan susungo.

⁴Akiyo kosaapi, akiyo kohasilo koasi; tukon saapi nabukuanan naikon bapuian badaang.

⁵Sakisii mojujul sidutu bantile kai komobisa; sakisii moaki nainangga sidutu bakala-kala.

⁶Komian mobabanggaal aki naikon teali mamangan konapikiran; mian mopandoi balajal tukon aki nasulit.

⁷Inaikai mopolaing tukon mian molongas; akiyo komo laate nainotunggukon doi komuyu.

⁸Komian momamangan konapikiran toiyo sio bulaando kona kabaiyano; mian longas totipu doi nalongasan.

⁹Komian longas aki napaduliyo oilakai nalalim inompuni kai aki; mian monondok yase nainompuni kona lalim.

¹⁰Sanaang kai susah tangaboso doi noano lalomo; komian bailon aki natulutiyo lasakanggene.

¹¹Komian monondok nabonua tataap mongggol; mian lokis nabonua naikon tolubang.

¹² Daano kololoon motokita moloyos, bai doibundu loloon doo sasalane komatean.

¹³Doi kokumbitan baliko daano kokkiilan; kotedesan laatemo kona pupusan tukon matean.

¹⁴Komian lokis naikon pupuwo kokulokisan saono; mian monondok naikon mopupui monondokan saono.

¹⁵Komian longas anggayo doi samba kobantilan; mian mamangan konapikiran natindakan ati-ati.

¹⁶Komian monondok kona pikiran sidutu badagai tukon dedenggene kokulokisan; mian longas naikon sanaang, maka nalasayo aman.

¹⁷Komian moyase nggimolon longas natindakan; mian mamangan konapikiran kotambongo sabar.

¹⁸Komian moakiyo kona pangalaman naikon teali longas; komian mamangan konapikiran naikon tosuungi komontoiyan.

¹⁹Komian lokis naikon loingiyo doi mian momoloyos konoano; tuuk makabi sulano nasineneseang.

²⁰Komian motalalais kotula-tulano, aki nasanaanggene; bai mian mokaasa badaang konasobat.

²¹Indee mototulaiyo komian bailon mokubai lalim; indee komonondok konoano doi mian motalalais naikon sanaang.

²²Indee komo usaha monondok naikon inangga tukon malaat pongodotii; indee komo baniatene mokulokis daanon doi loloon mosasaat.

²³Doi samba kousaha lalomo daano konauntung; basalitaan mokosong kabayo komian tuwong talalais.

²⁴Komian momamangan konapikiran ngginaal sabab namamanganan konapikiran; mian longas tololongol sabab nalongasan.

²⁵Kalu meeng komian sakisii bantile kana yana salamatene kobutongo; kalu yana bakalakala, yana loilokise kotulano.

²⁶Komian momangangga doi TEMENENO teali aman; tukon nakaluargaa naikon daano konasoopan.

²⁷Maanggaan doi TEMENENO daanon namonondokan uuno; tukon loloon tuuk modedenggene komatean.

²⁸Kotomundo nakasaan tobinggakon doi narayat nakandang; akiyo korayat yana aki nabalakuasa.

²⁹Komian momamangan konapikiran aki namosobit nggimal; komian longas aki nalaate taane kobutongo.

³⁰Noa motanaang makalikodong kobutongo; misikit konoano bunokai panakit momangakate.

³¹Indee komonondok kona kakabai doi mian motalalais, odotiyo kona Mian Bisa; indee komopipike komian mo miuk totulaiyo komo tealikene.

³²Komian lokis silaka sabab nakulokisan; mian monondok soop doi namololean.

³³Kopandoiyan sidutu daano doi mian momonondok konoano doi napikiran lalomo; bai mopinipiik doi mian longas napikiran lalomo.

³⁴Kokaadilan tukon monondokan bingkate kobangsa natanganggaan, bai kolalim kubaiyo kobangsa teali susah.

³⁵Tomundo sanaang doi napawe mopandoi; bai yana nggimoliyo kopagawe moaki naampakokene kona limang.