Read Banggai ANDEAN 15 Bible Online

ANDEAN 15 - Banggai bible

ANDEAN 15

¹Tukon potimbili monondok konggimalan tademo; potimbili moonas sumbutene konggimalan.

²Bantilan-bantilan mian mopandoi kubayo komontoiyan talike konoano; bantilan-bantilan mian longas tolongo koantoko longasan.

³TEMENENO kitayo saibino komoteali doi samba kotampat; Yana palaatikanggene saibino komonondok tukon mokulokis.

⁴Bantilan-bantilan monondok komololean tosuungi; bantilan-bantilan mominallason kubayo lemah kona kamauan.

⁵Komian longas aki napaduliyo kotamano naotinau; komian mamangan napikiran talimayo kopanganukon.

⁶Doi mian monondok nabonua daanon badaang kobuat; komian lokis nakaasan lapus sabab silakaan.

⁷Bantilan-bantilan mian momamangan konapikiran moono tukon montoiyan; bai pikiran mian molongas aki nabunodoiya.

⁸Komian monondok nasambeang TEMENENO talimayo, bai Yana misikitene komian lokis nasosubakon.

⁹Cara mian lokis natuboan TEMENENO misikitene, bai Yana misikitene komian mobalausaha molakukene Konamongiasan.

¹⁰Komian molakukene komo kulokis naikon sinakisaa, mian moaki naiyase inanuukon naikon mate.

¹¹TEMENENO toiyo komian mate nalipu tukon nacara-cara; bulaa konatealian banggapi napikiran sinookon luwedoi Yana?

¹²Komian moaki naiyase mototulai aki naiyase inanuukon; yana aki naiyase makabi otunggul luwedoi mian momamangan konapikiran.

¹³Noa mosanaang kabayo koduduso montontilan; noa mosusah lotoyo komololean.

¹⁴Komian momamangan kona pikiran mounggoli montoiyan; mian longas nggabut tukon nalongasan.

¹⁵Komian mosusah sio banggadudul balajuang doi natuboan lalomo; bai komian mosanaang sidutu bagia.

¹⁶Tadukai soisik kobuat bai pinolainggon komatakutan doi TEMENENO, luwedoi badaang kobuat bai pinolonggon ko manasalan.

¹⁷Tadukai makaan nusuwon bai pinolainggon koposeangan, luwedoi makaan sail monondok bai pinolainggon komo minisikiton.

¹⁸Komian mosobit nggimaal osumbute kopoodanganian; komian mosabar babayo kopaladamaean.

¹⁹Komian momalas naikon sidutu alamiyo kokasukalan; mian mojujul aki naposunggene kokasulitan.

²⁰Pau momamangan kona pikiran, kotamano noano sanaang; pau molongas aki nahalagaiyo kotinano.

²¹Kolongasan daanokai kasangan mian longas, mian momamangan kona pikiran tubo moloyos.

²²Koniat aki teali, kalu aki napinikikon; niat modaano kohasilo, kalu badaang momobee otinau.

²³Bantilan-bantilan mobinantil tapaat kotempono, lubatene kokasanangan.

²⁴Komian momamangan konapikiran mololoi loloon motogal motujuiyo kotuboan; bolikon loloon motokolu mo tujuiyo komatean.

²⁵TEMENENO naikon lubange komian na bonua mo katandake konoano, bai meeng komian balu nabuta yana lindungiyo.

²⁶TEMENENO misikitene koniat mo kulokis; bai bantilan-bantilan monondok konoiyo konoano.

²⁷Indee mounggolii untung moaki nahalal, manasemo kona kaluargaa susuungo. Indee momisikitene kodoy patambo, naikon tubo monondok.

²⁸Komian monondok pikikenekai kona bantilan-bantilan; mian lokis bantile kolangge-langge mokulokis.

²⁹TEMENENO ndongoliyo kalu kai mian monondok sambeang, bai yana aki napaduliyo komian mopalalentel.

³⁰Koduduso sanaang konoano tedes, bilita monondok kona ansang segaal.

³¹Komian motalimayo kopanganukon tongusokon mian momamangan kona pikiran.

³²Komian moaki naiyase inotunggul aki naodotiyo kobutongo susuungo mian moyase talimayo kopanganuukon teali monondok konoano.

³³Matakutene ko TEMENENO daanon alas didikan monondok; pongodotii linolukoni noano napependean.