Read Banggai ANDEAN 16 Bible Online

ANDEAN 16 - Banggai bible

ANDEAN 16

¹Kobanggapi moola mokubai niat, bai Mian Bisa komo putusiyo.

²Samba komian nakokubai moolakai monondok doi napambaleng susuungo, bai TEMENENOkai monilaiyo konoano namakisuud.

³Monggianggakenemokai sasaibino komu niat doi TEMENENO; maka ikoo naikon balahasil mo lakukene.

⁴Sasaibino kolobo TEMENENO nakinubai daano konatujuiyo; tukon natujuiyo tuuk doi mian lokis doiyamo silakaan.

⁵Saibino komian babanggal TEMENENO misikitene; Yana aki nasodiikene yanila luput luwedoi ukuman.

⁶Komian mototobos doi Mian Bisa naikon malaat pongompuni: Mian momangangga naikon luput luwedoi sasaibino kokulokisan.

⁷Kalu ikoo tenaanggene ko TEMENENO noano, mumusuh-musuh yana tealikene tulano.

⁸Lobian monondok kohasilo soisik tukon najujuran, luwedoi nahasil badaang tukon aki naadil.

⁹Banggapi moola makabai niat, bai Mian Bisa motantukene kona loloon tuboan.

¹⁰Tomundo matalima kuasa luwedoi Mian Bisa, jadi, yana akuyo konasalah doi nakaputusan lalomo.

¹¹TEMENENO yase komian mojujul doi nabadagangan lalomo, koidan mapake ukulan tukon timbangan.

¹²Tuuk mobalakuasa, makabai lokis daanokai kulokisan, sabab napamarentaan monggol sabab kaadilan.

¹³Katalangan mokana tananggene komo balakuasa, yana mamasikene komian mo basilingan tukon jujul.

¹⁴Tomundo nanggimalan bunokai bilita ukuman mate; mian momamangan konapikiran naikon balausaha nakependeo.

¹⁵Tomundo noano namonondokan lubatene kotuboan monondok, buno bunom molebesenggene koudan doi tempo pital.

¹⁶Malaat pandoian moddoon kona lobianan monondok luwedoi malaatan mosoni; malaat montoiyan lobian koanggano luwedoi malaatan tambaga.

¹⁷Komian monondok dedenggene komo kulokis; mian mopalaatikanggene kona cara tuboan, lindungiyo kopulino.

¹⁸Kobabanggalan kobaliko kalusakan; kobabanggalan kobaliko otuwongan.

¹⁹Tadukai pependeo konoano tukon akiyo konabuat; luwedoi molainge komian babanggal tukon mosananggene kobuat yanila molampase.

²⁰Palaatikanggene oila komo inotunggukon doikoo, maka ikoo naikon malaat oila komomonondok; anggayomo ko TEMENENO, maka ikoo naikon monondoko.

²¹Komian momamangan konapikiran tiningonii luwedoi napikiran momamangan; nacara basilingan menalik kubayo kona bantilan-bantilan pololokon nainangga.

²²Kopikiran namamanganan doiyamo mian monondok konoano naluwean konatuboan; mian longas sakisaa luwedoi nalongasan susuungo.

²³Komian monondok konoano napikiran kubaiyo kona bantilan-bantilan mamangan; tukon naotunggul pololokon inangga.

²⁴Bantilan momiuk buno dokot; maamis kotamiso tukon butongo kekedek.

²⁵ Daanon kololoon motokita moloyos, bai doibundu loloon doo konatujuiyo matean.

²⁶Komomotaan tuuk makaan delenge komian sulano berusaha; sabab tiano, maka yana pakisayo balimang.

²⁷Komian lokis berusaha silakayo kotulano; kona bantilan-bantilan lokis buno aung mokait.

²⁸Komian molokis osumbute kopodanganian; tombosalitaon tinggale kona sobat tuuno.

²⁹Komian monggimolon tipuwo kotula-tulano; tukon babayo yanila doi susah lalomo.

³⁰Badagaikai doi mian moboit tukon balamaenggene komatano; yana daanon baniatene kokulokisan doi noano lalomo.

³¹Komian mojujul naikon bineekai umur momoloas; kona buuk mbombol buno kai makota motontilan.

³²Aki namosobit nggimal tadukai luwedoi modaano konakuasa; kuasaiyo kobutongo tadukai luwedoi lungguiyano kota.

³³Sulano ndatoiyo kotuboan, kobanggapi sabut lot, bai komo tantukene kopotimbilino tolongo TEMENENO susungo.