Read Banggai ANDEAN 17 Bible Online

ANDEAN 17 - Banggai bible

ANDEAN 17

¹Tadukai songguman kolabuwe tinundukon konaamanan; luwedoi kinaan modaano kopitaminno molobi-lobian tinundukon kopodanganian.

²Ata mopandoi naikon balakuasa doi pau mo mokubai maa; tukon naikon matalima pusaka polaing dopaudo utus-utuso.

³Mosoni tukon salaka inudi doi babunsaan, bai komian noano TEMENENO udio.

⁴Komian lokis tulutiyo kopikiran-pikiran molokis, mobakala-kala yase mondongolii bantilan-bantilan bapitanaa.

⁵Indee komo sosiboliyo komian motalalais, totulaiyo ko Mian Bisa mopasitakayo. Indee komo tedes doi nasusaan komian, tantu malaat ukuman.

⁶Komian mo babanggal motuamo doiyamo napau tumbu, kopau-pau nababanggalan doiyamo tamano tinano.

⁷Komian moinolomati aki teali bantile kobantilan-bantilan mokala; komian longas aki namoola bantile kobantil-bantilan modaano koanggano.

⁸Daano komo sanggayo doi posogok laate kubaiyo komo minasaindinggon; tukon doi sogok sasaibino moola lapa.

⁹Kalu komian yase kilakene, maafkanggene yanila nasalah mo lakukene. Moosumbute-osumbute kokasalahan tolongo putuse koposobatan.

¹⁰Meeng kopanganukon lobian koalatino tuuk doi mian monondok konoano luwedoi sakat kopongumbas doi mian molongas.

¹¹Komian longas sidutu sumbutene kokulokisan, bai matean lubat doi yana bunokai binotokon nggimolon.

¹²Tadukai pososuung tukon asu lobo tinano molapus kona pau; luwedoi mian molongas mobalimang tukon nalongasan.

¹³Indee komo balese komondokan tukon kulokisan; kokulokisan doo aki naikon sumbut luwedoi nabonua.

¹⁴Mangatambuun podanganian daanon buno mobukayo kopaisu naloloon; tobikon doiya undulemo nakiyon natinabuun kopodanganian.

¹⁵TEMENENO misikitene komian mo talakanakene komian lokis; tukon mosalakene komian moakiyo kona salah.

¹⁶Palasuma komian longas moakabuse kodoy mounggolii pandoian; sabab yana akiyo kopikiran monondok.

¹⁷Meeng kosobat sidutu totobos doi tulano; bai meeng koutus lainge motanggunge kosusaan.

¹⁸Komian moberjanji sulano teali mobeale kotulano nasamea, daanon mian molongas.

¹⁹Komian moiyase kolalim, yase podangani. Komian babasal kosuungo, unggoliyo konamanasan.

²⁰Meeng komian mobakala-kala aki naikon sanaang; komian alepo panga naikon malaat silaka.

²¹Malaat pau molongas koalatino malaat kasusahan; kopau molongas moteali tamano aki nabeena kasanangan.

²²Noano sanaang kobutongo monondok; momanasal konoano moloto konasamangat.

²³Hakim moserong matalima doy pobeal cara laasia tukon aki naampakokene kokaadilan.

²⁴Komian badombalaakon mo daano kona pangalatian doiyamo tuuk namalaat pandoian; bai komian longas mobadombalaakon aki natantu.

²⁵Kopau molongas kubayo susah kotamano; tukon kubayo sedih kotinano noano.

²⁶Aki napantas anodinenda doi mian moakiyo konasalah; aki teali pipiike komian momonondok konoano.

²⁷Komian mamangan kona pikiran, aki nabadaang konasilingan; Komian momamangan konapikiran sidutu tanaang.

²⁸Meeng komian longas kai naikon inanggon pandoi tukon mamangan konapikiran kalu yana aki nabiyok tukon kosuungo tatutup.