Read Banggai ANDEAN 20 Bible Online

ANDEAN 20 - Banggai bible

ANDEAN 20

¹Suka moininum kubayo komian akiyo kona atulan tukon nggabut. Longasokai komian moinum sampe malangu.

²Tomundo nggimal bunokai singa nangaatonan, mian mosumbutene kona nggimalan koalatino sakisaayo kobutongo susuungo.

³Tolongo mian molongasoo mo yase podangani; ndodoong mongginaal doiyamo dedenggene kopodanganian.

⁴Kopatani momalas aki nalimange konaasi doi tempono; doibundu doi tempo bapupuiyan akiyo oi-oilah kona hasil.

⁵Komian noano antoko umpama bubung paisuno moateang; bai mian moola mangauk moano kona pangalatian.

⁶Badaang komian mangakukene kobutongo daanon tulano; bai mobisa-bisa totobos susah napinosunggon.

⁷Kopau-pau mosanaang tuuno kalu daano kotamano momonondok tukon moloyos kona tuboan.

⁸Kalu tomundo osulang doi nakursii pangadilan; yana moola kitayo sasaibino komo lokis.

⁹Daanokai komian mo balakuasa, “Konoanggu bilisii, yaku tosodiimo luwedoi lalim?”

¹⁰Kotimbangan tukon ukulan moaki naadil TEMENENO aki nasanaanggene.

¹¹Luwedoi pau nakokubai moola tinoi oilakai nakalakuan doo monondok tukon moloyos.

¹²Tolingaino tuuk mondongolii tukon mata tuuk mambaleng; kolua-luano TEMENENO kai komo pasitakayo.

¹³Komian moiyase moolo naikon teali talalais. Komian molole balimang badaang konakinaan.

¹⁴Momongoli sidutu basilingan tantang koanggano maaling. Bai saibino mongoli yana tedes doi anggano natinalima.

¹⁵Bantilan-bantilan moano komontoiyan; lobian koanggano luwedoi mosoni tukon intan

¹⁶Indee komo tanggunge komian bailon nasamea; moola inala kona buat salaku patataan naperjanjian.

¹⁷Buat hasil batipuan, tumbe-tumbeno sanaang naomiiyo; bai lapa doiya lasayomo buno kalikil saibino.

¹⁸Natetel daano kohasilo sabab napikikanano; tobikon doiya, inaimo kai baladuang kalu akiyon mukubaiyo mutetel mo monggol.

¹⁹Komian mosanaang salitayo komian bailan, aki namoola abese kolaasia; inaimo balagaul tukon mian motodudul badaang kona salita.

²⁰Komian mobatotopikene kotinano tamano, kona tuboan naikon lapus buno posi moposo doi popook mokalipokan.

²¹Kobuat tumbe-tumbeno moilaat tukon mosobit; doibundu tokita boilikon balakat.

²²Inai mobalese kokulokisan tukon kulokisan; anggayomo kai ko TEMENENO yanamo kai naikon komo tulungio.

²³Naraca tukon timbangan batuno moaki naadil TEMENENO aki nasanaanggene.

²⁴TEMENENO lapamo tantukene kololoon kobanggapi natuboan doi dunia nia; doiyamo kona sabab banggapi mangalatikene mokona tuboan susuungo naloloon.

²⁵Pikikene mono-monondok akiyoon dondikene sosubakon doi TEMENENO; moola teali naikon lapa doya manasalo.

²⁶Tomundo momamangan konapikiran toiyokai indee komian lokis; yana naikon ukume yanila akiyo koampuno.

²⁷Kobanggapi noano lalom buno kai madialang luwedoi TEMENENO mokadiolongiyo posaapon konoano.

²⁸Kalu Tomundo maparetah tukon maasi, jujul tukon adil, maka yana tataap balakuasa.

²⁹Komian tabokon minatakuton sabab nabukuanan; tukon tama tina inodotii sabab mbombolo konabuuk.

³⁰Daano kotempono mosopot komo inalami mohapuse kokulokisan; tukon mobilisiyo kobanggapi noano.