Read Banggai ANDEAN 21 Bible Online

ANDEAN 21 - Banggai bible

ANDEAN 21

¹Pokakana ko TEMENENO moatule kopaisu batango sulano namololong tulutiyo Kona mongiasan, bunomo koidan Yana bimbinge ko tomundo napikiran.

²Samba komian nakokubai moola kai monondok doi napambaleng lalomo susungo, bai TEMENENO komo tilike konoano namakisut.

³Kokubai moadil tukon mokana lobian sanaanggene ko TEMENENO luwedoi sasaibino komo sinosubakon.

⁴Komian lokis doo baladosa sabab nababanggalan tukon nasombongan kuasaiyomo.

⁵Komian molole natetel babayo kolobianan; tindakan mosobit-sobit kobaliko kakulangan.

⁶Kokaasaan moilaat tukon aki najujur, mosobit lapus tukon babayo komian doi kibul lalomo.

⁷Komian lokis aki nayase mololoi ukum; nakulokisan susungo yana sakisaa.

⁸Komian modaano konasalah mopatek-patek kololoonno; komian monondok sidutu jujul kona tuboan.

⁹Dungol doi papak pasuno sanaang tuuno dungol doi meeng kobonua tukon boloki moiyase podangani.

¹⁰Komian lokis sidutu yase lakukene kokulokisan, doi indekai yana akiyo kona pamaasikonan.

¹¹Ukuman tuuk mobatotulai teali otunggul tuuk mian moakiyo kona pangalaman. Kalu mian monondok konoano inanuukon yana naikon tosungi kona manggaan konapikiran.

¹²Mian Bisa Mo Adil toyo oilah komo teali doi mian molokis nabonua lalomo. Yana naikon daunggene yanila tobikon yanila silakah.

¹³Indee aki naiyase mondongolii mian mokakulangan nabantilan aki naikon napialatikanggon kalu yana susuungo makabi tulung.

¹⁴Tuuk moposoiyo koliitan tukon ngggimalan, beenakai tambo secara akiyo kobiyoko.

¹⁵Kalu kokaadilan inampakonggon, maka komian monondok nalasayo sanaang, bai komian lokis nalasayo susah.

¹⁶Komian moaki natulutiyo cara tubo monondok, tantu polong doi mian mate nalipu.

¹⁷Komian moiyase balasanang-balasanaang naikon tataap daano kona kakulangan, komian moiyase bapopoiniak aki naikon nateali kaasa.

¹⁸Kalu komasarakat TEMENENO ukume, bolikon mian mononndok, bai kai mian lokis malaat kasalahan.

¹⁹Tadukai dungol doi padang lalomo, dungol tukon boloki moiyase palabubuk tukon lit-lit.

²⁰Komian momamangan konapikiran tataap monondok tukon kaasa; bai komian longas akabuse kona buat.

²¹Indee balausaha sulano kaadilan tukon pomamasikonan kinubai; naikon malaat namonondokan pongodotii tukon umur momoloas.

²²Komian mo pandoi sanggupe lebuute kokota modinagai suludadu mobarani; yana manase kobenteng-benteng yanila mo balanggena.

²³Tuuk moakiyenggene kokasukalan tadukai naati-ati tukon bantilan.

²⁴Komian mobabanggaal tukon mokatandake konoano yase basosibolii tukon palalente.

²⁵Sipamalas mo yase balimang akateo kobutongo tukon naminomooton.

²⁶Posopokon koooloyo yana tolongo pikikene tentang oila kona minomooton. Kobaliko mian mosio natulus moola mebee tukon lobi-lobian.

²⁷TEMENENO aki nasanaang tukon mosinosubakon mian molokis lobi-lobian kalu sinosubakon tukon makisut mo sinosibolii.

²⁸Mokala-kala kona sinakisii aki naikon nainangga; bai bantilan mian motoiyo kona loloiyanao kopalakala naikon motinalima.

²⁹Komian mojujul anggayo naikon kobutongo komian lokis koduduso bondolong.

³⁰Akiyo kopandoiyan pandoi kai momamangan konapikiran momoola batahan doi TEMENENO salaano.

³¹Maukai doi polobosian sinadiakon tukon adalan polobosi, motatukanggene komanaangan doiyamo TEMENENO.