Read Banggai ANDEAN 22 Bible Online

ANDEAN 22 - Banggai bible

ANDEAN 22

¹Sambu monondok lobian koanggano luwedoi buat momadaang; lobian monondok mian seseange luwedoi mobine suasa tukon mosonii.

²Komian mokaasa tukon mian motalalais daanong komeeng kolangge mopokakana; TEMENENOkai moposilakayo yanila saibino.

³Komian momamangan konapikiran badodonggon kalukai kitayo kosilakaan; komian longos ampakon bangadudul maka ilupa kasusahan.

⁴Komian momangga doi TEMENENO tukon kependeo kobutonggo, naikon monondok, makmur tukon inodotii.

⁵Talong tukon palako talaat doi mian molokis naloloon; dedenggene saibino doiya kalu ikoo yase mosalamat.

⁶Otunggulekai meeng kopau cara tuboan mobisa tuuk doiyana, maka polong doi tempo nalakaian yana naikon tubo bunodoiya.

⁷Komian motalalais mian mokaasa kuasaiyo; komian mobabinggat kinuasai luwedoi mobinggotiyo.

⁸Komian momotifas kolokisan naikon pupuiyo kokasuhan; doibundu kona kuasa tuuk lakukene todu-todudulo naikon lapus.

⁹Komian monondok konoano TEMENENO balakaatiyo, sabab yana ebese komokinaan doi mian mokakulangan.

¹⁰Sikayomokai komian moyase batotulai, maka tademokai kopasalakonan, pomusuwan tukon pososibolian.

¹¹Komian moyase kototobosan tukon momaamis kona silingan, naikon teali tomundo nasobat.

¹²Tukon bongkale kobakakalaan mian molokis, TEMENENO dagaiyo sulano komotoiyan mobisa tataap topiala.

¹³Sipamalas yase dongol doi bonua; yana bantil, “Daano kosinga doi tonggulung, yaku bisa mosinoku doi loloon tangano.”

¹⁴Boine mobabalowa nalayuan bunokai patalonggon; mian mo TEMENENO moukume tepelesok doilalomo.

¹⁵Kanamokai pau-pau mokubai langge-langge molongas, bai bonggon moola naajale yanila naboliyo kona kalakuan.

¹⁶Indee komo yase teali kaasa tukon pipike komian motalalais tukon beena palasen doi mian modaano doi bundu naikon talalais.

¹⁷Ndongoliyokai yaku naikon otunggule doi komuyu otunggul mian mopandoi! Palatikanggenekai daku otunggul.

¹⁸Ikoo naikon sanaang kalukai daku otunggul doo ikoo abese doi noamo lalomo. Sabab tukon buno doiya ikoo siapo kalukai ikoo naikon mopakeyo.

¹⁹Yaku otunggulikene diabudodoo doi komuyu sabab yaku yase ikoo momangabos mumangganggaan doi TEMENENO.

²⁰Tolukolono kootunggul molapamo kutulise tuuk ikoo — otunggul-otunggul koantoko montoiyan tukon otinau momonondok;

²¹tukon naikon mootunggulikene doi komuyu oila komo bisa-bisa kana. Totiili, kalu ikoo sinadai, ikoo moola beena potimbili mokana.

²²Inaikai muloingiyo komian motalalais, tolongo sabab yana akiyono kona daya; tukon doi sidang Pangadilan Inakai mopalakosayo komian moakiyo kona daya.

²³Sabab TEMENENO naikon belayo yanila kopalakala tukon kibute komian ansaang tukon pipike yanila.

²⁴Inaimo balagaul tukon mian moiyase nggimal tukon mosobit liba kosau.

²⁵Totili ikoo naikon kitayo yana, tukon akimo nateali koidan lapusene kabiasaandoo.

²⁶Inaikai mopalandandi tuuk motanggunge komian bailon nasamea.

²⁷Totiili kalu ikoo aki namoola olunasio, komu, tampat mooloan kai naikon inala.

²⁸Inaikai idan-idan mobiyele buta kallatano molapamo kotumbumuyu tataap kanggene.

²⁹Anomokai ko mumongkitaan mian mo pandoi lakukene kona limang? Doi mianoo naikon balimang doi tomundo-tomundo nakamali bolikon doi bonua mian mo biasa.