Read Banggai ANDEAN 23 Bible Online

ANDEAN 23 - Banggai bible

ANDEAN 23

¹Kalu ikoo osulang kaan tukon meeng ko pamarentah neneekai indee yana.

²Kalu ikoo daano komu nafsu kaan badaang, tahanemo komu minotondoo.

³Inai modoko kaan momaamis mosinidokikon, banggokai yana okoliyo ikoo.

⁴Inaimokai mobasusah-susah sulano teali kaasa. Putusemokai mutetel doo.

⁵Sabab, sopiongan lalomo komu buat moola lapaus, ugat-ugaat yana daano kokapilo tukon benga doi dapang buno tomisi rajawali.

⁶Inaimokaan polaing komian mopatuk. Inai koidan momemetene naikon kona kinaan maamis.

⁷Sabab, yana naikon bantil, “Mai ndakaan; sungiyo koidan,” banggokai kona makisud bolikon bunodoiya. Yana nabasilingan maamis, bai konoano posasala.

⁸Kabudoon oila molapamo ikoo lemese ikoo abali toluwekene, tukon saibino mubantilan-bantilan momaamis doiyana akiyo kotakoso.

⁹Inaikai mongotinau mian molongas; yana aki naikon nahargaiyo muotinaudoo.

¹⁰Inaikai mobiele komubuta pusaka kallatanokai mangala pau tuboon koona nabuta.

¹¹Sabab, TEMENENO daanon mobelayo mobukuanan, yanamokai naikon pembela molawane ikoo.

¹²Palatikanggenekai muguru naotunggul tukon balajal badaang lunggon.

¹³Inaikai momata-matakut didike mupau. Kalu ikoo bobokiyo yana tukon bonggoon,

¹⁴yana aki naikon namate, tukon naikon salamat.

¹⁵Kupau, yaku sanaang tuuno kalu ikoo mamangan komupikiran.

¹⁶Yaku sanaang kalu ndongoliyo ikoo mabantil, bantilan-bantilan motapaat.

¹⁷Inaikai mo mosikit konoamu doi mian mobaladosa. Taatkai sidutu doi Mian Bisa sulano tempo sinasalaan tadagai,

¹⁸tukon muminoinikon aki nalapus,

¹⁹Kupau! ndongoliyo, tealikai mamangan mupikiran. Palatiksnggene tuu-tuu komucara tuboan.

²⁰Inaikai mogouliyo komian momalangu kai mian momodoko.

²¹Sabab yanila naikon teali talalais. Kalu ikoo moola tolong, maka aki namalubit koidan ikoo naikon bapakean motebe-tebending.

²²Taatio kotamamo; sabab akiyo yana ikoo akiyo. Kalukai tinamu motuamo, tudeikenekai baikon ikoo adotiyo yana.

²³Otunggul mokana pandoian, didikan, tukon pangalatian — saibinodoo sio nainoli, bai todudul koanggano tuuk binalukon.

²⁴Meeng kotama naikon sanaang kalu konapau konoano monondok; yana naikon sanaang kalu konapau mamangan kona pikiran.

²⁵Bolisii tamamu tinamu sanaang doikoo; bolisii namonondokkan koboine mosungge ikoo.

²⁶Palatikanggene mono-monondok tukon tudoikene daku tuboan, kupau!

²⁷Yanila lolobotio buno palampok kubaiyo badaang komala-malanemo baloloa.

²⁸Moluko monakal mobaloloa daanon talong mo bahaya.

²⁹Ikoo toiyokai komo teali doi mian momonginum anggur todudul badaang tukon idan namatamis minuman mosopot? Mian doo sakisaa tukon mandarita. Yana sidutu podangani tukon bantil. Komatamu memela tukon kobutongo; dedenggon, banggokai saibinodoo moola nahinalangi.

³¹Inaikai mosodiikene koanggur nagodayo ikoo maukai kobotiko menalik tuuno tukon tokita montontilan doi galas lalomo tukon mololong usok tukon namonondokan doi bulungo kajungo lalomo.

³²Dodoa soono ikoo lasayo buno binda bisa sokuwo.

³³Mumata bakunang-kunang, mupikiran ngabut tukon suumu mio-miok.

³⁴Ikoo lasayo buno daanoon doi kapal natiang bunduno doi tobun tangano; Olumu masakit tukon ikoo tapaso-pasokon.

³⁵Maka ikoo bantil, “Bunokai yaku binobinobokii tukon mian tapiyo, bai yaku aki kuneneeke oila komoteali. Adu, yaku pipiito tuuno! Yaku palalu monginum koidan!”