Read Banggai ANDEAN 25 Bible Online

ANDEAN 25 - Banggai bible

ANDEAN 25

¹Motunduwo naiya daano kobubula kootunggul bailon luwedoi Salomo ko sambu-sambu doi Hizkia nakamali, tumundo Yehuda.

²Mian Bisa inakabasal sabab oila komai lahasiakon; tomundo inodoti sabab oila komo moola lalakanggene.

³Buno ndalangon moatean tukon timbu motatandak, bunokai doiya kotomundo napikiran moaki laate salamiyo.

⁴Bilisiikanggene loluk kosalaka luwedoi sanganya, maka namoola koseniman limano nabentuke komonondok.

⁵Poalaase kopongotinau-pongotinau molokis luwedoi kamali, maka kopamarentaan monggol doi naadilan.

⁶ Kalu mangadap doi tomundo siokai kependeo konoano, inai babunokon mian kosambu motatandak.

⁷Tadukai nasinumboli liba doi tampat mohinolomati tuuno luwedoi mosinumbolikon mobeekene komu tampat doi mian molobian kona pangkat.

⁸Inaikai mosoi-sobitikene mobabayo kopalakala doi pangadilan; sabab, kalu doi bundu ikoo totoimo salah oilamo koidan komo moola kulakukene?

⁹Salah paham doi tulamu, uluse kai nalapa tolongo tukon yana, bai laasia mian bailon inaikai ikoo bukayo.

¹⁰Sabab ikoo naikon sinaap bunokai mian motombo salitaon tukon kosambamu lokiso pomatekon.

¹¹Pandapat mopinolonggon tapat kotempono buno mosoni saonoh doi pinggan salaka lalomo.

¹²Panganukon komian pandoi doi mian moyase mondongolii, bunokai sosolut mosoni kai pobu-bungai kencana.

¹³Bobitokon mosatia, kubaiyo kona bobitokon sanaang, buno paisu memel tuuk mobapapui doi asi.

¹⁴Perjanjian-perjanjian moaki nainokitakon, bunokai bunom tukon mombuul moaki nalubatene koudan.

¹⁵Kosabaran pinolainggon kobantil-bantil mo monondok laate moolakene komian mo balakuasa, tukon momanase saibino komoilawan.

¹⁶Inai mokaane kodogot badang-badang; tantu ikoo teali mamaap.

¹⁷Inaikai motodudul idan lubat doi mupokolanian na bonua, naikon yana bosan maka misikitonggon.

¹⁸Palait moaki nabisa moola mangakate, buno sabel, palu kai panah momamangan.

¹⁹Maanggakai kopenghianat doi tempo kosusahan, daanon buno momakar tukon ngolingo mongginggiok kai ampakon tukon aino mo lemat.

²⁰Pomanyanyi tuuk doi mian mobaladuka bunomo lauwa doi nakumelan lalomo buno mabatung cuka doi nadedeng.

²¹ Kalu komu musuh malaal, beena yana kaan; tukon kalu yana molou, beenakai yana monginum.

²²Tukon bunodoiya ikoo kabayo yana teali mamaa tukon TEMENENO naikon mobalakaatikon.

²³Mombuul lembet tantu lubatene koudan; bunomo koidan balundingan tantu sumbut konggimalan.

²⁴Dungol doi papak pasuno lobian konasanaanggan tadukai dongol meeng ko bunoa tukon boloki moyase kopogagaian.

²⁵Matalima bilita mo monondok luwedoi tano modoon buno monginum paisu memel salataa molou.

²⁶Mian monondok momengalah doi mian molokis buno paisu matano mo kundot kai bubung momadikit.

²⁷Aki namonondok makaan dokot lobi-lobian, buno koidan aki namonondok mobantile badaang kopanggaal.

²⁸Komian moaki namoola kuasaiyo kobutongo bunokai kota napalataanan lapamo minanas.