Read Banggai ANDEAN 29 Bible Online

ANDEAN 29 - Banggai bible

ANDEAN 29

¹Indee komo banggadudul babanggal kalu inotinau, meeng kotempo naikon manas tukon akimo nakininondok koidan.

²Kalu kai mian adil maparentah, korayat sanaang. Bai kalu kai mian lokis balakuasa, korayat mandarita.

³Indee moyase kopandoian, sanaanggene kotamano noano. Indee komo balagaul tukon mobalolowa akabuse kona doy.

⁴Kalu mobalakuasa palaatikanggene kokaadilan konatano naikon monggol. Bai kalu yana tongo paraluwo kodoy, konatano naikon manas.

⁵Indee komo nggaale kotulano, taane kotalong tuuk butongo.

⁶Komian lokis kanakon talong sabab nalalim, komian mojujul lasayo sanaang tukon bagia.

⁷Komian monondok toyo komian lemat nahak, bai komian lokis aki napahamiyo.

⁸Komian moiyase basosibolii laate monggabute ko kota, bai komian momamangan konapikiran tanaanggene kokaadaan.

⁹Kalu mian momamangan konapikiran tukon mian molongas bapalakala, komian longas doo tolongo nggimal tukon kokumbit tobikon sumbutene konggabutan.

¹⁰Komian monondok konoano mian momoloukene kosau minisikiton, bai komian mo monondok lindungiyo.

¹¹Komian longas nggimal secara tarang-tarangan, bai komian momamangan konapikiran sabar tukon taane kona nggimalan.

¹²Kalu mobalakuasa palatikanggene ko bilita mokala, kona pagawe naikon teali lokis saibino.

¹³Meeng komian talalis tukon mopipiike daano kona pokakanaan; doi kolua-luano TEMENENO beena matano tuuk nakitayo kotuboan loango.

¹⁴Kalu tomundo belayo komian momiuk nahak, doi taun-taun yana naikon namaparentaan.

¹⁵Pongotunggul tukon panganukon tealikene komian mamangan konapikiran. Pau motinuluti sidutu kona mau akamaayo kotinano.

¹⁶Kalu mian lokis balakuasa, kopalanggalan tuboi. Bai komian jujur naikon nggola kitayo komian lokis namanasan.

¹⁷Pootunggulkene komupau, maka yana naikon beekene kokaamanan doikoo, tukon teali hibulan doi koo.

¹⁸Bangsa moaki namalaat bimbingan luwedoi TEMENENO, teali bangsa mobadaang konggabutan. Kinatawan komian motaat doi TEMENENO naukum.

¹⁹Meeng koata aki nalaate inotunggul tolongo tukon bantilan-bantilan. Yana mangalati, bai aki naikon napalatikanggene.

²⁰Lobian badaang tuuk komian longas naminoinikon, luwedoi mian mobasilingan moakiyo kona pikiran lolukon.

²¹Ata mosineseang tambun doi natabokonan, doibundu naikon teali pagaga.

²²Komian momosobit nggimal kubaiyo badaang komian mopodangani tukon baladosa.

²³Komian mobabanggaal naikon kinependek; mian mokependeo konoano naikon ngginaal.

²⁴Komian mopokokonoi balimang tukon pondikuk, koalatino misikitene kobutongo susungo. Kalu yana bukayo doi pangadilan, yana naikon kanakon ukuman. Bai kalu yana aki nabiok tolong, yana naikon kanakon ko Mian Bisa natotopi.

²⁵Matakutene naikon komian napalaat, kobaliko kasusahan. Anggayomo kai ko TEMENENO, maka ikoo naikon aman.

²⁶Badaang komian moyase mounggolii loloon doi mobalakuasa, bai komo beena kaadilan, tolongo TEMENENO tolong.

²⁷Komian monondok aki nasanang tukon mian molokis; komian lokis mosikitene komian monondok.