Read Banggai ANDEAN 3 Bible Online

ANDEAN 3 - Banggai bible

ANDEAN 3

¹Inaikai motoliminggene naikon oila komolapamo kuotunggulikene doikoo, kupau. Nenekekai sidutu daku parentah,

²sulano namoloas komuumur tukon mutuboan namonondokan.

³Siokai ikoo tataap mangangga tukon satia doi Mian Bisa tukon tula-tulamu. Neneekekai doiya tukon abesemo doinoamu lalomo,

⁴ sulano musinananggon tukon Mian Bisa tukon banggapi naanggayo.

⁵Anggayomokai ko TEMENENO tukon sasaibino konoamu, tukon inai kai mobalanggene komu pangalatian susuumu.

⁶Neneekekai ko TEMENENO doi sasaibino kolobo ikoo molakukene, maka yana tudoikene doikoo cara tuboan momonondok.

⁷ Inaikai moanggene kobutomu lobian pandoi luwedoi motutuu; anggayomokai ko TEMENENO tukon dedenggenekai komo lokis.

⁸Mukakabai doo naikon teali buno pakuli doi koo moaline kobutomu tukon mokidendeke konoamu.

⁹Odotiiyokai ko TEMENENO tukon mososubakon doi yana luwedoi sasaibino komu buat tukon mubuta hasilo momonondok,

¹⁰maka komu longgo-longgo naikon moonoh gandum, tukon muanggur paisuno naikon molobi-lobian tobikon aki nasukup kotampat bangabosan.

¹¹ Kalukai TEMENENO anukene ikoo, kupau, talimayokai doiya salaku meeng kopoingotii, inai konoamu manasal doi Nadidikan doo.

¹² TEMENENO manganuukon mian Nakinilakon, pokakana meeng kotama moanuukene konapau sineseang.

¹³Untungokai meeng komian moteali pandoi tukon malaat pangalatian.

¹⁴Konakauntungan badaang tuuno luwe doi moilaat luwedoi salaka, lobian koanggano doi mosoni.

¹⁵Kopandoian koanggano lobian luwedoi batu montontilan; sasaibino ikoo neneeke aki mulaate konapokakanaan.

¹⁶Kopandoian beekene doikoo koumur momoloas, kokaasan tukon hinolomati.

¹⁷Kopandoian kubaiyo komutuboan sanang tukon monondok.

¹⁸Komian momonggol konabatanian doi pandoian naikon toupiyo kotuboan motutuu tukon sanaang.

¹⁹Tukon pandoian, TEMENENO pasitakayo kodunia: tukon Napikiran doi Yana noano tetelengane kotimbu doi Natampat.

²⁰Tukon Yana Na montoiyan kubaiyo kopaisu naluwe-luwean doi buta taikon doibilit mapasa tukon mololongo kopaisuno tukon bunom doi timbu kundongikene kopaisu doi dunia.

²¹Sabab doiya bataniankai doi pandoian tukon potimbongikene mobisa; kupau! Inaimo sodiiyo,

²²maka mutuboan naikon topiala — monondok tukon sanaang.

²³Ikoo ampakon tukon aman tukon aki naikon natakait.

²⁴Ikoo naikon tauso moolo aki murasayo matakut, tukon ikoo moolo tombosokon pomodoakon.

²⁵Aki naparalu ikoo matakutene naikon kosilakaan mososinggot lubat buno mbeus, tukon kanakono ko mian-mian lokis.

²⁶TEMENENO naikon dagayo ikoo. Yana aki nasodiikene ikoo natongusokon doi kobo doo lalomo.

²⁷Kalu daano komukamampuan tuuk kabaiyo monondok doi mian moparaluwo mumonondokan, inaikai motolayo tuuk molakukene langge doo.

²⁸Inaikai mosumboliyo kotulamu totiili polong modowa, kalu doi tempo nia koidan ikoo moola tulungiyo.

²⁹Inaimokai mobaniatene meeng kolobo molugikene kotulamu modungol pokolani ikoo tukon anggayomo ikoo.

³⁰Inai podangani akiyo kona sabab tukon memeeng komian moaki nabiasa mokubai lokis doi koo.

³¹Inai mosikit doi mian mogunakanggene konamotikasan tukon inai motulutiyo yanila nakokubai.

³²Sabab TEMENENO misikitene komian momokubai lokis, bai yana pokonoi tukon momoloyos konatuboan.

³³TEMENENO kutuke komian lokis nabonua, bai balakaatio komian motaat doiyana nabonua.

³⁴ TEMENENO misikitene komian mobatinggai bai balakaatio komian mopependeo konoano.

³⁵Komian mopandoi naikon tosuungi babangi kosambuno, bainokai mian longas polokon sinosibolii.