Read Banggai ANDEAN 31 Bible Online

ANDEAN 31 - Banggai bible

ANDEAN 31

¹Naiyamo kobantilan-bantilan mobinantil luwe Lemuel tinano, tomundo Masa doi napau.

²“Kupau, noanggu natolongan, Yaku mosuunge salaku kusambeang potimbilino. Oilanokai naikon daku bantilano doi koo?

³Inaikai mokokobukuan kai motipase mubukuanan doi boine. Sabab badaang kotomundo mosilaka sabab boine.

⁴Neneeke kai, Lemuel! Monginum anggur tukon monginum inuman mokalas, aki nateali tuuk mobalakuasa.

⁵Sabab, kalu kai tomundo monginum inuman mokalas, yana toliminggene naikon koukum tukon aki namopusinggon mian momiuk nahak.

⁶Inuman mokalas daanon tuuk yanila mopoloong tukon mo sedih konoano.

⁷Yanila monginum sulano natoliminggene kotalalaisan tukon yanila nakasusahan.

⁸Belayokai yanila mo aki namoola belayo kobutongo susuungo. Lindungiyokai sasaibino komian nahak moakiyo konadaya.

⁹Balajuango kai tuuk yanila, tukon tealimokai hakim moadil. Lindungiyo kai komian motalalais tukon mian mopinipiik nahak.”

¹⁰Boloki mopandoi sulit napinosunggon; yana lobian koanggano doi intan montontilang.

¹¹Kona langkai aki naikon nakakulangan oila-oila, sebab daano kona inanggakon doiyana:

¹²Yana aki nabiasa kubaiyo lokis doi nalakai: pomatekon yana kubaiyo komomonondok doi yana.

¹³Yana molole pototongikene korami tukon domba buluno maka sibuk mobalimang batonun.

¹⁴Luwedoi namoddoonan yana lubatene kokinaan buno mo kapal-kapal padagang nailakukon.

¹⁵Dodoa soono yana banguno tuuk mosadiayo mokinaan tuuk nakaluargaa, tukon tuuk ebe-ebese kolimang doi napeleleani-peleleani.

¹⁶Yana mounggoli meeng kobuta petako maka naoliyo; yana usakanggene meeng koanggur asino luwedoi napandapatan.

¹⁷Yana sadiayomo kobutongo tuuk balimang kokobukuan.

¹⁸Yana toiyo baikon sasaibino doo nakinubai, anoo kountungo: yana balimang polong lobianno kopopook.

¹⁹Banang mopinutal tukon toik motinonun.

²⁰Yana aki napatuk doi mo daano konakakulangan; yana monondok konoano doi mo palaluwo kopotombonii.

²¹Yana aki namatakut kalu kai tempo memel nalubatan, sabab kojeket tasadia tuuk nakaluargaa.

²²Yana susungo mokubaiyo kona parmadani, kona pakean luwedoi toik lenan manampal mohebat.

²³Konalangkai daanon mian tollongol — salah komeeng komian luwe doi antara saibino kokatua kota.

²⁴Yana mokubaiyo pakean tukon poboot, maka balukene doi padagang.

²⁵Yana tambongan tukon inodotii: tukon aki namatakut tentang oloyo motinotili.

²⁶Tukon poi-poiniak yana basilingan; nabantilan-bantilan mamangan konapikiran.

²⁷Yana sidutu molole balimang tukon palatikanggene koulusan nabonua lalomo.

²⁸Yana konapau-pau hargaiyo, tukon nalangkai nggale.

²⁹“Daanon badang koboine momonondok,” nalakai bantile, “bai ikoo komonondok tuuno luwedoi yanila saibino.”

³⁰Koduduso monondok aki namoola pinalasaya, tukon monondokan lapus; bai boine motaat doi TEMENENO teali malaat panggaal.

³¹Balase saibino kona monondokan; yana boine mopatut inolomati doi yaa-yaa!