Read Banggai ANDEAN 4 Bible Online

ANDEAN 4 - Banggai bible

ANDEAN 4

¹He labuk-labuk, ndongoliyokai tamamu naotinau! Palatikanggenekai doiya, maka ikoo naikon teali monondok.

²Kuinotunggukon doi komuyu nia monondok; sebab doiya ikoo inaikai mopandange enteng.

³Salataa doi kupoipoisikan tinanggu tamanggu napau langgongo,

⁴tamanggu otunggule yaku. Yana bantile, “Neneekekai naikon daku otinau-otinau inaikai sidutu ikoo toliminggene. Ampakokenemo daku otunggul-otunggul, sulano mutuboan monondok.

⁵Tealimo pandoi tukon talakana! Neneekekai sidutu daku otunggul-otunggul tukon inaikai poaisene.”

⁶Anggayokai kopandoian, maka kopandoian naikon lindungiko; Kilakene yana maka yana naikon dagayo ikoo sulano tataap aman.

⁷Lobo mopenting komo sio ikoo lakukene tumbe-tumbeno doiyana balausaha teali mamangan konapikiran. Oilakai komu ilolonggon, kotumbeno doiyamo balausahakai tuuk malaatan pangalatian.

⁸Osungemokai kopandoian, maka yana naikon katandake ikoo. Tomboniyokai yana, maka yana naikon lubatene kona inolomatian doi Koo.

⁹Yana beekene doi koo kopot bunga momonondok tuuk teali mumakota.

¹⁰Ndongoliyokai yaku, kupau! Palaatikanggenekai mono-monondok daku otinau-otinau, maka komu umur naikon bulusan.

¹¹Yaku lapamo otunggulikene kopandoian doi koo tukon tudoikene kocara tuboan motalakana.

¹²Kalu ikoo tubo bunodoiya, maka ikoo naikon aki mutataan doi tempo ampakonan, tukon aki natakait doi tempo obulenan.

¹³Neneekekai sidutu naikon otunggul molapamo ikoo talimayo doiyaku. Dagaiyo koiya mono-monondok, sabab tukon dokuotungguloo komu tuboan naikon daano kohasilo.

¹⁴Inai mololoiyo komian lokis nakokubai, tukon inai motulutiyo yanila nakakabai-kakabai.

¹⁵Inaimokai poanggayo doi yanila doo. Badodonggon doi yanila tukon ampakono banggadudul!

¹⁶Komian lokis akiyoon namoola kalu akiyoon nalakukene moaki namonondok. Yanila aki napipiit kalu akiyoon nasilakayo komian bailon.

¹⁷Kulokisan tukon baranian doi yanila pokakana kokinaan tukon inuman.

¹⁸Mian molokis naloloon kalipokan buno popook nakalipokanan. Yanila takait tukon otuwong aki natoiyo. Kobaliko, loloon moiloloi mian monondok daanon buno oloyo matano nasumbutan; polokon malumbit polokon madialang, polong doi bundu teali madialang tuuno.

²⁰Palatikanggenekai daku bantilan-bantilan, Kupau! Ndongoliyokai daku otinau-otinau.

²¹Inaikai mosakukene, baikai abesemokai sidutu doinoamu lalomo.

²²Mian moamangalatikene naikon tubo tukon teali makalikodong.

²³Dagaiyokai konoamu mono-monondok, sabab konoano tantukene komu tuboan loloono.

²⁴Inaimokai mobantile kolobo moaki natalakana. Dedenggenemo kobantilan-bantilan mokala tukon bantil-bantilan momakisud tuuk kubaiyo sasat komian.

²⁵Siokai kodudusomu laango tokita konoamu natotobosan; aki napalalu ikoo lakukene pokakana daano kosool doi batu sembeleng.

²⁶ Pikikene namono-monondok akiyoon mumakabai, maka ikoo naikon daano kohasilo doi sasaibino muusaha lalomo.

²⁷Dedenggenekai komo lokis, tukon tubomokai tukon jujul. Inaimokai molias luwe doi loloon motalakana.