Read Banggai ANDEAN 5 Bible Online

ANDEAN 5 - Banggai bible

ANDEAN 5

¹Kupau, ndongoliyokai yaku! Palaatikanggenekai daku pandoiyan tukon kupangalatian kuinotunggulikon doi ikoo,

²sulano ikoo toiyo bulaando ikoo sio babayo kobutomu tukon basilingan salaku mian mo moanokonamotoian.

³Moluko monakal, kosuungo buno dokot namamisan tukon nabantilan-bantilan mobidukiyo konoano,

⁴bai kalukai tauso sasaibino, mototinggal tolongokai momosopot tukon sakisawan.

⁵Ikoo kinubut bulus doi dunia mian mate; loloon nailoloi konatujuiyo doi matean.

⁶Yana aki natataap doi loloon motujuiyo kotuboan; moaki natoyo yana liaso luwe doi loloon doo.

⁷Tobikon doiya, labuk-labuk, ndongoliyokai daku bantilan-bantilan tukon inaikai motoliminggene.

⁸Dedenggene koboine mo bunodoiya! Tukon inai mokolaniyo konabonua.

⁹Kalu ikoo balagaul tukon boinedoo ikoo naikon lapus komukahoromatan tukon muansaang naikon pinakisaa mokinubut doi tempo mutabokonan luwedoi mian moaki natingoniyo kopomamasikonan.

¹⁰Komukasaan naikon komian bailon kabus kaane, tukon muhasil pakadakan teali mian koona moaki mutingoniyo.

¹¹Doibundu ikoo naikon basi-basilingan, kalukai kobutomu panakitono.

¹²Maka ikoo bantile, “Eh, bulaando yaku momisikitene kootinau? Bulaando moaki kuyase inanukon?

¹³Yaku aki kuyase mondongolii daku guru-guru tukon aki kuyase moturutiyo yanila.

¹⁴Toi-toiyo yaku tuwongo doi masarakat matano.”

¹⁵Tobikon doiya satiamokai doi muboloki susungo tukon bekenekai komu kilakanano doi yana tolong.

¹⁶Akiyo kotakoso doikoo mounggolii namonondodokan doi mian mobolikon muboloki.

¹⁷Namonondokan doo tolongo tuuk ikoo tukon muboloki aki natukon mian bailon.

¹⁸Tobikon doiya, siokai ikoo sanaang tukon muboloki susumu: unggoliyo konakasanangan doi boine molapamo ikoo koloiyo.

¹⁹Boine motambongan tukon mopandoi buno kijang. Sodiikene kobutongo natambonganan sidutu kubaiyo ikoo tindo-tindo tukon nababibianan ikoo malangukene.

²⁰Oila kotakoso momemetene koboine bailon kupau? Oila kotakoso mobalagaul komoluko mopalalentel?

²¹TEMENENO kitayo sasaibino kobanggapi nakinubai. Doi yaandokai kobanggapi natausan TEMENENO komoawasio.

²²Komian lokis nalalim bunokai talong motokoot mian doo susungo.

²³Yana mate sabab aki namatalima otinau. Kona babanggalan babayo yana doi namanasan.