Read Banggai ANDEAN 7 Bible Online

ANDEAN 7 - Banggai bible

ANDEAN 7

¹Neneekekai, daku bantilan-bantilan, kupau, tukon inai motoliminggene naikon oila daku pinalentakon doi koo.

²Loingiyokai daku otinau-otinau sulano ikoo tubo monondok. Loingiyokai daku otunggul-otunggul mono-monondok bunokai ikoo dagaiyo komatamu batuno susungo.

³Neneekekai sidutu naikon daku otunggul-otunggul doo, tukon abesemokai doi mupalasaan noamu lalomo.

⁴Anggapemo kopandoian salaku utusomu tukon montoian salaku musobat tuuno.

⁵Kopandoian naikon dedenggene ikoo luwe doi moluko monakal, luwe doi boine morayuwo tukon bantilan-bantilan momamis.

⁶Daano kooloyo meeng yaku kokondong mbalenge luwe doi kubonua dendelano.

⁷Maka yaku kitayo kotabo badaang modaanon molumbong bai tolongo daku pinalatikanggon meeng komian molongas doi antara yanila.

⁸Doi nakinobianan salataa tambunno kokalipookan, tabo doo ampa-ampakono lolani kololoon nasekuan motujuiyo komeeng kobone natampat dungolan.

¹⁰Boine doo boine moaki natataap dungol doi nabonua. Soisik-soisiken yana daano doi loloon bibilo, doi bundu doi lapangan kai kona kokondongan mototiili doi kasangan. Kotambongo barani tukon aki natoiyo komaa. Kukitayo yana sumbut tukon pakean balolowan, tukon pososuung doo tabodo tukon tetel molokis.

¹³Yana lebeke tabo doo tukon umayo. Akiyo kona maa-maa bantilokai yana,

¹⁴“Oloyo nia yaku sio beale daku niat, tukon tuuk doiyaku lapamo sosubakene daku sosubakon.

¹⁵Doi yamo kosababpo yaku sumbut tuuk unggoliyo ikoo, sulano ikoo kaan doi kubonua. Diabudodoo yaku posuung ikoo!

¹⁶Daku tampat moloan lapamo kualase tukon sepelei mobabunga-bunga luwe doi Mesir,

¹⁷tukon lapamo babangi wangi-wangian mur, cendana tukon kayu manis.

¹⁸Diabudodoo, maimo kita pokuade-pokuade tukon nikmatio koasmara doi popookia lalomo.

¹⁹Daku lakai akiyo doi bonua, yana daanon moampakon moddoon.

²⁰Yana mababa doy badaang, tukon aki namule naikon doi lua nia kominggu lalomo.”

²¹Bunodoiya kai boine doo nalayuwano tabo doo tukon asi-asio motobolis tobikon yana salayo.

²²Yana aki napikikene loingiyomo boinedoo buno saapi mobinaba doi tampat batembelan tukon buno mian motinaan tukon binaba sulano namatalima ukuman mosinadiakon tuuk mian molongas;

²³soisiken koidan pana matano naikon tadul doinoano. Buno tomisi mobenga konatujuiyo doi talong, bunokai doiya tabo doo aki nasadaliyo kobutongo kanakon susah.

²⁴Tobikon doiya labuk-labuk ndongoliyokai yaku. Palatikanggenekai daku otinau-otinau.

²⁵Inai mosodiikene boinedoo bunodoiya mogangguwe konoamu; inai motaus unggoliyo yana,

²⁶sabab yana lapamo manase badaang komala-malane natuboan. Aki tangait konakadaang komo silaka sabab yana.

²⁷Taus doi nabonua koalatino mangala loloon mopalus motujuiyo komatean.