Read Banggai PONGOTUNGGUL 1 Bible Online

PONGOTUNGGUL 1 - Banggai bible

PONGOTUNGGUL 1

¹Bantilan-bantilan nai kitab nia lalomo kona asal luwedoi Mo Pikikene, Daud namalane, mosoboliyo Daud teali tomundo doi Yerusalem.

²Komo Pikikene bantil: Saibino sia-sia tukon akiyokotakoso! Tuboan doo palasuma, saibino akiyo koalatino.

³Pomatekon kita balimang, bubul kolumbos. Bai, nando kohasilo kita molaate maka ndababanggaakene?

⁴Katurunan momeengo lubat tukon katurunan bailon lapuso bai dunia tataap pokakana.

⁵Oloyo matano modaano mosumbut tukon modaano koidan mosopok. Tukon pakadak yana abali doi natampat tumbeno, maka nasumbut koidan.

⁶Mombul puul taikon lalom, maka napuul doi lembet; yana bapasokon bapasokon, maka naabali koidan?

⁷Saibino kopaisu batanggo lomba doi tobun, bai kotobun aki namoono. Kopaisuno abali doi paisu batango naluwean maka tambuuno koidan molomba.

⁸Sasaibino bantalakene tukon dobantalaanoo konatabantilan aki namoola binantil. Komatanggita aki nabobosul mambaleng kotolingainggita aki napuas-puas mondonggolii.

⁹Oila komo biasa teali, naikon teali koidan Oila komo biasa linakukon, naikon linakukon koidan. Akiyo kai kolobo meeng mo boolu doi dunia nia.

¹⁰Daano komian mobantile, “Kitayokai, naia boolu!” Bai, doiya daanomo akiyon ndasinuung.

¹¹Komian akimo naikon naneneeke domotealidoo doi looluk. Bunokai doiya kotealian diabudodoo tukon doimontotilian, bai akiyo naikon komian moneneeko doi tempo molubat.

¹²Yaku, komo Bapikir, maparenta doi Yerusalem salaku tomundo doi Israel.

¹³Yaku tekaat moselidikio tukon pelajariyo tukon pikiran momamangan sasaibino komo teali doi dunia nia. Ko Mian Bisa mosadiayo kotuboan doi kita salataa doi ndatangallaisan.

¹⁴Yaku lapamo kitayo saibino komian nakakabi doi dunia nia. Anggayomokai, sasaibino doiya akiyo kotakoso, buno usaha mololonggon mombuul.

¹⁵Komo patek aki namoola kinoloyos, tukon komo akiyo aki namoola inait.

¹⁶ Dakupikiran, “Yaku nia teali mian mopenting tukon pandoi, dondoon lobian dakuliinano luwedoi saibino komian momamarentah doi Yerusalem tumbe-tumbeno. Yaku pototongikene badaang komotoiyan tukon ilimu.”

¹⁷Maka yaku tekaat sulano kutoiyo konaposasalaan antara montoiyan tukon kobongguan antara pikiran mamangan tukon bongguan. Bai tokita yaku nia tongo buno mololonggol mombuul tolong.

¹⁸Sabab pololokon badaang kopandoian doi kita, pololokon badaang komotiyondoi kita, polalokon badaang koidan khawatiran. Polokon badaang komotoiyan doi kita, pololokon badaang koidan kokasusahan doi kita.