Read Banggai PONGOTUNGGUL 12 Bible Online

PONGOTUNGGUL 12 - Banggai bible

PONGOTUNGGUL 12

¹Neneekekai doi Mopasitakakon modaanon ikoo motabokon. Moakiyoon nalubat kotaun-taun mobadaang kosakisaa. Doi tempodoo ikoo naikon bantil, “Daku tuboan aki namondok.”

²Kalu dotempodoo lubat komatamu akimo nataraang, sampe adukono kooloyo panano bituwon tukon bituwon pauno akimo nataraang. Bunom mokalipookan babayo kondan; tataap lolainge ikoo pokakana moancame ikoo.

³Kololosuamu busak tukon koidan akimo namebee soopan. Koaimu motobuka naikon muyuko akimo nubukuan. Ngolimu aki nacukup tuuk mobasaiyo komukinaan. Kabur komatamu tobikon doiya ndalaso komu pokita.

⁴Kona ramean kololoon polong doi tolingaimu tolongo ndalas-ndalas. Musiik alalo tukon bagilingan kabi-kabi aki mulengele. Ikoo akimo mumoola moolo tombosokon. Tomisi alalo kubaiyo ikoo aki mutombosokon.

⁵Ikoo matakut toliboiyo kotampat motatandak tukon muampakon sio muhati-hati. Komu buuk mombol tukon koaimu ikoo tade-tadekene doi muampakonan. Maka lapuso sasaibino komunias tukon mominomooton. Kita sasalanemo konda tampat dungolan mopangabisan, komian-mian moberduka tukon momandaung popuson kololoon.

⁶Korante suasa naikon bontol tukon tanga-tangalaas; posi mosoni tuwong tukon mapasa; alos patambuk bontol tukon rusak; kendii manas tukon tanga-tangalaas.

⁷Butonggita naikon abali, teali abu doi dunia. Ansaang ndatuboan naikon abali doi Mian Bisa. Yanamokai komo beekene salaku Naanugerah mobinekon.

⁸Kubantilan, bisa sasaibino doiya akiyo kotakoso, sasaibino percuma, akiyo koalatino.

⁹Ko Sang Pemikir doo pandoi tukon bijaksana konapikiran. Sabab doiya yana otunggulikene doi umat saibino kona pengetahuan. Badaang koandean kona pinalajari, maka yana naujio kona talakanaan.

¹⁰Yana berusaha napososunggene kobantilan-bantilan penghibur, tukon jujur konatulisano kobantilan-bantilan.

¹¹Mian pandoi nabantilan buno meeng kopadagai natongkat momangan, dotongkatoo napinake tuuk polindungi nadomba. Andean tukon otinau napinototongikonan, buno paku mopinakukon tuuno. Sasaibino doiya Mian Bisa komo beekene koidan, nda padagai moakiyo komo liisiyo.

¹²Daku pau, meeng kolangge kaliangano ikoo sio mubadagai. Motulisan kitab akiyo konapupusan, tukon sio nabadaang luunggon ndabalajar pakadakene kojiwa tukon raga.

¹³Sambuno lapa yaku timba-timbange sasaibino, naiamokai konakasimpulan yaku molaate. Matakutenekai ko Mian Bisa tukon loingiokai saibino Kona parentah, sabab tolongo tuuk doiyamokai kabanggapi Napinasitaka.

¹⁴Mian Bisa naikon adiliyo saibino konda kokubai; mo monondok tukon molokis, tukon kai motosookon koidan.